Заңсыз аңшылық үшін сотталды

Арал аудандық сотында Қазақстан Республикасы ҚК-нің 337-бабының 1-бөлігімен айыпталған И., Д. және Ә-ге қатысты қылмыстық іс қаралды.Сотпен анықталғандай, сотталушылар Ә-ның басқаруындағы «Урал» мотокөлігімен түнгі мезгілде Арал ауданы, Қаратерең елді мекені «9 очко» бөгеті маңындағы мал жайылымына барып, заңсыз қоян аулаған. Рейдтік іс-шара кезінде И., Д. және Ә. полиция қызметкерлеріне ұсталып, мотокөлікті тексеру кезінде, оның ішінен 2 дана өлі қоянның денесі, аңшы мылтығы және жарық түсіргіш прожектор табылып, айғақ зат ретінде алынған. Сотталушылар осы іс-әрекетімен мемлекетке 36075 теңге көлемінде залал келтірген.
Сот үкімімен И., Д. және Ә. Қазақстан Республикасы ҚК-нің 337-бабының 1-бөлігінде көзделген қылмыстық теріс қылықты жасағандары үшін кінәлі деп танылып, 1 жыл мерзімге аңшылық қызметпен айналысу құқықтарынан айыра отырып, 20 айлық есептік көрсеткіш- 48100 теңге мөлшерінде айыппұлдар салынды.
Заттай дәлелдеме ретінде танылған аңшы мылтығы мен «Урал» маркалы мотокөлік мемлекет пайдасына тәркіленді.
Арал аудандық сотының
баспасөз қызметі