Толқын Tolqyn.kz ақпараттық агенттігі
» » Өрттен зардап шеккен отбасыға көмек көрсетілуде

Өрттен зардап шеккен отбасыға көмек көрсетілуде

Өрттен зардап шеккен отбасы ауруханадан шыққан бойда дайын уақытша баспанаға орналастырылады. Бұл туралы қала әкімінің орынбасары Елмурат Рахматуллаев қала әкімдігінде өткен брифингте хабарлады.
«Қала әкімдігі оқиға орын алған бойдан шұғыл әрекет жасап барлық көмектерді қарастырды. Отбасы ауруханадан шыққан бойдан дайын уақытша баспанаға орналастырылады. Сонымен қатар, қажетті азық-түлік, төсек орындар, киім-кешектер және басқа да қажетті құралдармен қамтамасыз етіледі», – деді Елмұрат Рахматуллаев.

Брифинг барысында облыстық денсаулық сақтау басқармасының өкілі Бибізада Дүйсенбаева қазіргі таңда отбасы мүшелерінің жағдайы қанағаттанарлық деңгейде екендігін мәлімдеді.

Ал қалалық төтенше жағдайлар басқармасының бастығы Жасулан Туйменов «Қазіргі таңда сараптама тағайындалып, өрттің шығу себебі анықталуда. Болжам бойынша өрт тоқтың қысқа тұйықталуы немесе ашық отты пайдаланудан болуы мүмкін», – деді.

Айта кетейік, өткен түні жедел құтқару қызметіне сағат 00:50 шамасында Әл-Фараби мөлтек ауданында орналасқан жеке тұрғын үйден өрт орын алғаны туралы хабарлама келіп түскен. Аталған мекен-жайға шұғыл жеткен өрт сөндірушілер түнгі сағат 01:23-те жалынды толығымен оқшаулап, өшірген. Алайда орын алған оқыс оқиға салдарынан отбасының 4 баласымен анасы орташа ауырлықта көмір қышқыл газына уланып, ауруханаға түссе, тілсіз жау 2020 жылы дүниеге келген бүлдіршіннің өмірін қиды.

syrboyi.kz
18 ақпан 2021 ж. 472 0