Ерікті жастар тегін бетперде таратты
Қоғамның қай саласында болмасын еріктілердің еңбегі ерекше. Олардың қолға алып жатқан істері мен баянды бастамалары соңғы бірер жылда айрықша байқалып келеді. Дәл қазіргі уақытта елімізде індет құрығына іліккендердің саны артып келеді. Бұл жерде бар мәселе сақтықта. Коронавирус инфекциясынан сақтанып, індеттің одан әрі таралуына жол бермеу үшін әрбір азамат күнделікті бетперде тағып, міндетті түрде сақтық шараларын мұқият орындауы тиіс. Осы қарапайым қағидаларды қаперде ұстап, сақтық шараларын күшейтуге орай, ауданның ерікті жастары күш біріктірді.Коронавирус індетінің алдын-алу, вирустық инфекцияның таралуын тежеу мақсатында аудан әкімдігінің ұйытқы болуымен аудан еріктілері мен жастар ресурстық орталығының қызметкерлері аудан орталығындағы халық көп шоғырланатын орындарда 700 қорғаныш бетперделерін тегін таратты.
Сондай-ақ, халыққа қауіпті індеттің таралу жолы, оның симптомдары мен одан сақтану шаралары түсіндіріліп, халық көп жиналатын сауда орындарында арнайы ескертпелер ілінді. Елене бермейтін мұндай жұмыстардың артында әсте үлкен жауапкершілік пен тұтас әлемді сақтаудың қарапайым қағидасы тұр. Сондықтан ескертпелерді ескеріп, сақтық шараларын қатаң сақтап жүрген жөн. Бұл әрекет арқылы әр адам өзін емес өзгені де қорғай алады. Осыны естен шығармаған жөн.
«Толқын» ақпарат
