Суға түсу кезінде қауіпсіздік ережесін сақтайық
Күн ысыған сайын су жағалауларындағы халықтың қарасы көбейетіні мәлім. Отбасы дос-жаранмен бас қосып, бой сергітіп, суға сүңгуге асыққан халық таң атысымен өзен-көл жағалауына қарай ағылады. Суда жүзуге, күнге қыздырынып, жағажайда демалу әрине адам денсаулығына пайдасы зор. Дегенмен демалыста сақтық әрі қауіпсіздік талаптарын ескеру аса қажет. Жаз айларында су айдындарында азаматтардың суға шомылуы кезіндегі сақтық шараларын сақтамауы салдарынан түрлі оқыс оқиғаларға ұшырауы жиі орын алады. Су айдындарындағы адамдардың өлімінің басты себебі-суда болу кезінде қарапайым қауіпсіздік жүріс-тұрыс қағидаларын сақтамау болып табылады. Тұрғындардың тек рұқсат етілген аймақтарда ғана шомылуға болатыны үнемі айтылып келеді. Алайда оны елемейтіндер баршылық. Өзендер мен көлдерде, тоғандарда, тоқтау сулар мен шалшық суларда шомылудың қаупі мол. Апаттың айтып келмейтіні белгілі ғой. Үлкенге де, кішіге де суға түсу кезінде аса сақ болу қажет.Суға әр түрлі жас топтарындағы адамдар түседі. Бірақ суға батқандардың көбісі-жас ер азаматтар. Су айдындарында адамдардың қаза болуының себептері де әртүрлі. Суға батқандардың жартысы ережені бұзған азаматтардан құралса, үштен бірі мас күйінде, енді бірі тыйым салынған орында суға шомылғандар, ал қалғандары үлкендердің қарауынсыз қалған балалар.
Суға түсуге барған адамдар төменде көрсетілген қағидаларды ескеру қажет!
* қауіпсіз немесе арнайы белгіленген жерлерден, жағажайларда және шомылатын
жерлерден бөлек жерлерде суға түсуге;
* суға шомылып жатқан балаларыңызды қараусыз қалдыруға;
* суда ойнауға, тентектік жасауға;
* шомылу барысында камера, доп, ағаштарды пайдалануға;
* жаяу жүргінші және көлік көпірінен суға сүңгуге;
* жүрек ауруымен ауыратын адамдарға суға түсуге;
* тыйым салынған жерлерде, терең және лай-қоқыс жерлерде суға түсуге;
*судың қатты ағысына тап болғанда, ағынға қарсы жүзуге;
* бейтаныс жерден суға секіруге;
* түнгі мезгілде суға шомылуға;
* таныс емес жерлерде суға шомылуға жол бермеу қажет!
Демалыс орындарында, сауықтыру лагерьлерінде суда өзін қалай ұстау керектігі жайлы нұсқама плакаттар ілінген. Судың қаншалықты қауіпті екендігін, қандай қасіретке алып келетіндігін барша қауым терең ойлап, басты назарда ұстағандары жөн. Су айдындарының көбісі шомылуға арналмаған. Бірақ соған қарамастан, балалар да, ересектер де барып, суға шомылатындары жасырын емес.
Адамның өмірінен артық құндылық жоқ. Сондықтан да, суға түскен кезде қарапайым ережелерді сақтау керек. Сонда ғана тілсіз жаудың қауіп-қатерінен аман қалуға болады. Жоғарыда айтылған ескертпелерді ескерте келе айтарымыз: Арал ауданының тұрғындарына және қала қонақтарына судағы қауіпсіз шараларына немқұрайлы қарамауға шақырамыз!
Арал ауданының Төтенше жағдайлар бөлімі Арал аудандық Полиция бөлімі
