Аудан әкімі шабындық алқабында болды

Аудандағы белсенді жастар өңірдегі қуаңшылықтың қиындығын еңсеруге көмек қолын созу мақсатында ерікті түрде шабындықтардағы шөп орымына қатысуда.

Белсенді жастардың Жетес би ауылдық округінен басталған игілікті бастамасы Қаратерең ауылдық округінде жалғасты. Бүгін аудан әкімі Серік Сермағамбетов шабындық алқабына барып, қызу жүріп жатқан шөп шабу жұмыстарына үлесін қосып, ерікті жастармен бірге пішен орды. Жем-шөп тапшылығын болдырмау үшін қолдарына орақ алып, шөп шауып жатқан жалынды жастардың жұмысына сәттілік тіледі.

Бұдан бөлек, 12 елді мекенде жасақталған еріктілер тобы бірлескен түрде аудан аумағындағы және көршілес аудандардағы шабындық жерлерден шөп шабуға атсалысуда. Шабылған шөптер мал азығын қажет ететін шаруаларға жеткізілетін болады.