Індет жас талғамайды
Қазір ас ішіп аяқ босататын, той тойлап қызық қуалайтын заман емес. Аждаһадай ақырып тұрған індет жасты да, жасамысты да қармағына іліндіруде. Бүгінде еліміз бойынша осы індетке байланысты барлық аймақта қауіптің "қызыл" деңгейі белгіленді. Соңғы он күнде облыста 2 мыңнан астам адам індетпен күресуде. Асқындырып алғандарға амал жоқ. Қос өкпені қысқан тажал індет туралап келгенде жас-кәріге қарамай ажал жастығына бас қойдыруда. Әрине бұл аурумен күресуде адам бойында иммунитет мықты болу керек. Ал сол мықты иммунитетті қалыптастыруда вакцинаның маңызы зор екенін көбі түсінбей келеді. Түсінсе де мойындағысы жоқ. Жоғарыда айтқан 2 мың науқастың басым көпшілігі сол вакцинаны алмаған науқастар екені белгілі.Бүгінде айтатыны жоқ, дерт өршіп, жаңа штамдар пайда болуда. Екі күннің бірінде қала көшелерімен арлы-берлі жүйткіген жедел жәрдем көліктері өмір мен өлім арасындағы арпалыстың талайына куә болып жүр. Ауруханаға жетпей жантәсілім еткен науқастар қаншама?! Осының барлығы біздің әлі де болса немқұрайлылыққа салынып, карантин талаптарын қатаң сақтамаудан болып отыр. Оның үстіне ұжымдық иммунитет қалыптастыру арқылы отбасын сақтау мәселесі де көп азаматтар тарапынан ескерілмей жатыр. Алдағы уақытта осы мәселеге атүсті қарамай, жиын-тойларды тыйып, көпшілік басқосуларға себеп болатын кештер мен серуендерден мейлінше бас тартқан жөн. Ең бастысы, әр адам өзінің және отбасының қауіпсіздігі үшін вакцина алдыру керек. Бұл бәріміз үшін маңызды.
С. ДОСТАНОВ,
қала тұрғыны
