Дәрігерлер еңбегін бағалаған абзал

Ауру адам талғамайды. Байсың немесе кедейсің деп бөлмейді. Қоғамға қанша жерден қажет болсаң да, күтінбесең дәл қазіргі уақыт қапыда қалатын кез. Ондайда әрине дәрігер көмегіне жүгініп, сауығу үшін бас сауғалап кетеріміз жасырын емес. Шындығында, дәл осы уақыттар осыдан бір жыл бұрынғы жағдайды еске түсіреді. Қаншама жанды жақынынан айырған аты өшкір індет ел ішін жайлағанда жанымызды қоярға жер таппай, есіміз шыққаны бар. Биыл да бұл індет халқымызды айналып өтпеді. Төтеннен келіп соққанда, көптің сандырағына сеніп, сау басына сақина тілеп алғандар көп болды. Салғырттық таяқ болып тисе де тіршілік қамымен жүріп, жұрт айтқан кеңестерге көп мән бермедік. Сондай жағдайдан сабақ алғандардың бірі өзім едім.

Қысқаша тоқталсам, үстіміздегі жылдың 29 маусымы күні пневмония диагнозымен ауруханаға түстім. Жан қысылғанда бұл дүненің базары мен қат-қабат тірлігі әдіре қалады екен. Қайта ауруханаға түскен сәттен біз үшін қызмет көрсетіп, дертіңе дәру болатын жылы сөздерін аямаған ақ халатты абзал жандардың еңбегі көп болды. Күндіз-түні жанымыздан табылған ауданның белгілі дәрігері Ж.Жақсылықов, дәрігер С.Серікбаева, аға аяжан Г.Сарбөпееваның еңбегі түсіне білгенге бәрінен жоғары. Шықпас жанға себепші, адам жанының арашасы болған мұндай жандар қандай құрметке болмасын лайық. Осы тұста біз өз өмірімізге де аса жауапкершілікпен қарау керек дер едім. Ақпарат ғасырындағы алуан түрлі қауесеттерді кейінге қойып, өз өміріміз үшін қажетті вакцинаны дер уақытында салдырған жөн. Негізі «саулық – сақтықта» деген сөз бекер айтылмаған. Басқа уақытты былай қойғанда, дәл қазіргі уақыт той тойлап, тамаша қуатын кез емес. Керісінше, сақтық шараларын берік ұстанып, өз өмірімізге жауапкершілікпен қарай білейік.

Миллят САДЫҚОВ,

Арал теңізі обаға қарсы күрес станциясы филиалының зоологі