Жетес би тұрғындары Жаңа жылды қарсы алды
Ұлыстың ұлы күні Наурыз мейрамы – байырғы заманнан келе жатқан “көктемгі жаңару” мерекесі екені белгілі. Наурыз - бес мың жылдан астам уақыттан бері тойланып келеді. Бұл мейрам Орта Азия халықтары, соның ішінде қазақ халқының да ұлттық мейрамы екені баршамызға аян.Сондықтан Ұлыстың ұлы күні жаңа тұрпаттағы жалпыхалықтық мерекеге айналып кетті. Ол – ұлттың ауызбіршілігін нығайтып, ұмытыла бастаған қазақылық қасиеттерімізді қайта тірілтуге септігін тигізеді. Ең бастысы, бұл бастама өскелең ұрпаққа үлгі, өнеге.Республика бойынша кең көлемде аталып өтетін Наурыз мейрамы Жетес би ауылдық округінде де өз деңгейінде тойланды. Ауылдық клубта Ұлыстың ұлы күніне орай ұйымдастырылған мерекелік шарада Наурыз көже дайындалып, клуб үйіне жиналған жұртшылық көже мен ұлттық астан дәм татты. Дәстүрлі өнердің бесігіне айналған Сыр бойындағы жұртшылық мерекелік шарада жас өнерпаздардың әуелеген әніне, мың бұралған биіне тамсана қарады. Ұлттық құндылықтарымызды ұлықтап, мерекеге сай ғұрыптардың куәсіне айналды. Шара соңында ауыл ақсақалдарының ақ батасын алып, Жаңа жыл жақсылығымен келсін деп жүздеріндегі күлкімен, қуанышпен тарқасты.
"Толқын" ақпарат
