Толқын Tolqyn.kz ақпараттық агенттігі
» » Арал ауданы әкімінің мерекелік құттықтауы

Арал ауданы әкімінің мерекелік құттықтауы

Ардақты ағайын, құрметті жерлестер! Баршаңызды Ұлыстың Ұлы күні – Наурыз мейрамымен шын жүректен құттықтаймын!Наурыз — ежелгі заманнан қалыптасқан жыл бастау мейрамы. Халықтың таным-түсінігімен, әдет-ғұрпымен, табиғатпен етене астасып жатқан, Шығыс күнтізбесі бойынша Жыл басы саналатын бұл мереке бүгінде жалпыхалықтық сипатқа ие.
Тамыры тереңге бойлаған Наурыз мейрамы еңсесі биік елдіктің, іргесі сөгілмес бірліктің, ырыс пен ынтымақтың мерекесі.
Жер бетінің қайта түлеп, табиғаттың арайлы шуағын шаша келетін шағы - адам баласына ерекше серпіліс беріп, рухани тазаруына ықпал етеді.
Күллі тіршілік атаулы ұйқыдан оянып, күн мен түн теңеліп, төрт түлік төлдеп, жер-жаhан жаймашуақ нұрға бөленетін мезгілді адамзат атаулы ерекше ілтипатпен қарсы алады. Сондай-ақ, дастарханға ақ толатын, елге бақ қонатын молшылықтың мерекесіне балайды.
Жаңару мен жасампаздықтың бастауы, ырыс пен берекенің арқауы болған Ұлыстың Ұлы күнінде адамдардың бір-біріне деген өкпе-реніші кешіріліп, достық пен келісім орнайды.
Адамгершілік пен татулықты паш ететін Әз-Наурыздың қоғамдағы тұрақтылық пен бейбітшілікті нығайтудағы рөлі орасан зор.
Еліміздің мерейін өсіріп, бар болмысымызды айшықтайтын қасиетті – Наурыз мерекесі әрбір отбасына бірлік пен қуаныш, құт-береке, бақыт пен молшылық әкелсін! Әз-Наурыз әр шаңыраққа шаттық нұрын себе келсін! Ұлыс оң болсын, ақ мол болсын!
Ізгі ниетпен, аудан әкімі Мұхтар Әуесұлы Оразбаев


20 наурыз 2019 ж. 1 439 0