Бүлдіршіндерін ақындыққа баулыған

Бала десе байыз таппайтын, тәлімді, тәжі­рибелі жанның бірі - №72 Райым орта мектеп жанындағы шағын орталық тәр­биешісі Қалдыгүл Тойбазарова десе болар.Ол 1982 жылы №81 Қызылжар орта мек­тебін бітіріп, сол жылы Қызылорда­дағы М.Мәметова атындағы педагогика­лық колледжінің мектепке дейінгі бөлім­іне түсіп, оны 1985 жылы тәмамдайды. Білім­ге құмар жан мұнан кейін Қорқыт Ата атындағы мемлекеттік универ­ситетке түсіп, жоғары білім алып шығады. Ал­ғашында Ескіұра бастауыш мектебінің меңгерушісі болып қызмет атқарған Қалдыгүл 2009 жылы №72 орта мектебі жанындағы шағын орталыққа тәрбиеші болып ауысады. Мамандығына деген махаббаты шек­сіз Қалдыгүл бала тәр­биесінде еңбек еткен 37 жыл ішінде ауданнан, облыстан алған алғыс, мадақ­тауларға толы десе ар­тық айтқандық болмас. Оған Райым елді мекеніндегі бүлдіршіндерін Қалдыгүлге сенім артып тапсырған ата-аналар куә.

Әсіресе оның бір ерекшелігі, жыл сай­ын Наурыз мерекесі қар­саңын­да шағын орталықтағы бүлдіршіндер санасына ұлт­тық өнер­іміздің үздік үлгілерін дарыта білуінде. Соның ішінде балаларды айтыс өнеріне баулудағы еңбегі ерекше. Өзі бас демеуші болып сый­лықтар әзірлеп, бүл­діршіндер арасында айтыс ұйымдасты­р­ып, оларды "Алтын домбыра" иегерлігіне баулуда. Бүлдіршіндерді кәдімгі айтыс ақынындай ұлттық киіммен сахна төр­іне шығу, отыру мәдениетіне баулу, бір-біріне екі-үш шумақтан жауап бер­гізіп, ақ­ындыққа бейімдеудің өзі үлкен еңбекті қаж­ет етеді. Қалды­гүл бүлдіршіндері үшін мұндай жұмыстан еш жалыққан емес.

Шағын орталықта биылғы Наурыз мере­кесі де ойдағыдай өтті. Балабақша бүлдіршіндері арасында бас бәйгені Нұрмахан, ал І орынды Раяна жеңіп алды.

Тәуелсіздіктің 30 жылдығы қарсаңын­да "Бала дарын" атты жасөс­пірімдер бай­қау­ына он бүлдіршін дайын­дап, қатыс­ып құт­тықтау мен марапаттар алса, осы жоба­ның атқарушы дир­екторы Н.Сәрсе­баев Қалдыгүлдің ұстаздық өлшеусіз еңбегін еңбегін жоғары бағалап, оған "Үздік жетекші" медалін табыстады.

Шағын орталықтағы бүлдіршіндердің бойындағы бұла талант­тың көзін бұлақ ашқандай ашып, оларды өнерсүйер қауымға  танытып жүрген тәр­биеші Қалдыгүл Тойбазарова әлі талай жетіс­тіктерге қол жеткізері сөзсіз.

Ж. ЖАҚСЫЛЫҚҰЛЫ,

Жетес би ауылдық округі