«Хагги Вагги» ойыншығы туралы не білеміз?

Баланың ой-өрісінің дамуына оның ойнайтын ойыншығы да әсер ететіні белгілі. Бала қолындағы ойыншық арқылы өз сезімін білдіріп, қоршаған ортаны сезінеді. Сонымен бірге балаға ойыншақ таңдауда ата-ана өзіне үлкен жауапкершілік артуы қажет. Сонымен бірге бүгінде дүкен сөрелерінде көздің жауын алатын түрлі-түсті ойыншықтар баланы да еліктіріп әкетері сөзсіз. Бала шетелдік мультфильм кейіпкерлерінің қайсысын іздесе де сатушы оны түр-түрімен алдыңызға әкеліп береді. Ендігі кезекте қазіргі балалар арасында сұранысқа ие, танымал ойыншықтардың бірі – Хагги Вагги құбыжық ойыншығы болып отыр. Бұл қандай ойыншық? Атаулы ойыншық бала психологиясына қалай әсер етеді? Бала неліктен сан мыңдаған ойыншық арасынан тек соны таңдайды деген сауалдар көпшілікті толғандырары анық.Алдымен ойыншықтың шығу тарихына тоқталып өтсек. Ұялы телефондағы «Poppy Playtime» хоррор-ойынынан бастау алған сюжет көрген адамды қорқынышты әлемге жетелейді екен. Онсыз да тісі ақсиып, көзі бадырайып, денесін түк басқан ұсқынсыз бейнелер  жұмбақ дыбыспен берілгенде бала бойын үрей билейді. Ойынның сценарийі бойынша ол жағымсыз кейіпкер. Түрі де ұсқынсыз болады. Бұл ойынның басты кейіпкері – ойыншық зауытының бұрыңғы қызметкері болады. Ол жұмбақ жағдайда жоғалған әріптестерін іздеп, бос қалған зауыт ішін шарлап жүреді. Ол құр жүрмей VHS кассеталарын жинап, зауыттың өткен күндерін сурет арқылы қалпына келтіріп жүреді. Осы сәтте оның ізінен бұл зауыттың ең танымал ойыншығы Хагги Вагги қуа бастайды. Одан қашып үлгермеген жағдайда басты кейіпкерді ұстап, оны жойып жіберуі мүмкін. Міне осылайша Хаггиден қашу арқылы, жоғары сатыға көтерілгенде ғана ойын жеңімпазы атана аласыз.
Атаулы ойын жарыққа шығып, кең көлемде тарала бастағанда ютуб арнасында құбыжықтың пайда болуы жайында анимациялық фильм жарыққа шықты. Сондай-ақ ол фильм 10 миллионнан астам қаралым жинаған болатын. Атаулы фильмде Хагги Ваггидің денесі Playtime зауытының бұрынғы қызметкері Вадзен мырзаға тиесілі екені айтылады. Ол жұмыста біршама жетістікке жетіп, отбасын құруды армандап жүреді. Дегенмен бір түннің ішінде оның өмірі түгелдей өзгеріп кетеді. Фильм бойынша зауыт шынайы құбыжық ойыншықтың бейнесін құрастырып шығарады. Зауытқа қаражат жөнінен үлкен пайда әкеледі деп болжанған жоба өкінішке орай ойдағыдай болмай шығады. Бұл бейнебаян тіпті тик-ток әлеуметтік желісінде танымалдылыққа ие. Содан да болар балалар арасында сұранысқа ие ойыншық ретінде қалыптасып кеткені.
Бұл ойыншықтың бағасын атап өтер болсақ, базарда – 2000 теңге, ал негізі түпнұсқасы – 6000 теңгені құрайды екен. Иә, баласының көңілін қалдырғысы келмейтін ата-ана ойыншықтың бағасына да қарамасы анық. Дегенмен бұл ойыншықтың бала психологиясына кері әсері бар екендігі туралы мамандар арасында сөз қозғалған болатын. Олардың айтуынша бұл ойыншық баладағы бақыт гармонының төмендеуіне, сондай-ақ психикалық ауытқулар тудыруы әбден мүмкін екен. Оның қорқынышты кейіпі балаға депрессивті сезім қалдырады. Бала сол ойыншықтың мимикалары мен эмоцияларын жаппай өзіне қабылдап алып, оларды айна ретінде көреді. Қоршаған ортаға басқаша көзқараспен қарап, тез ашуланшақ болады.
Міне, баланың болашағына балалық кездегі ойыншығы да әсер етеді екен. Сол үшін балаға ойыншық таңдарда оның түр-әлпеті мен қандай кейіпкер екендігіне аса мән бергеніміз жөн.

А.НҰРЛАНОВА