Билет бағасы өзгермейтін болды

Осыған дейін төменгі орындарды 20%-ға дейін қымбаттату жоспарланғаны туралы айтылған болатын. Өйткені төменгі орындарға жоғарғы орындарға қарағанда сұраныс көп. Тасымалдаушының мұндай жоспары жолаушылардың наразылығын тудырды.

1 желтоқсаннан бастап коммерциялық пойыздарда төменгі орындардың құны көтерілуі керек еді. Пилоттық жобаны келесі бағыттар бойынша енгізу жоспарланған: Алматы – Маңғыстау, Алматы – Орал, Алматы – Петропавл, Астана – Шымкент және Алматы – Атырау.

Бұл ретте жоғарғы орындардың бағасын түсіру туралы сөз болған жоқ. Алдағы бағаның көтерілуі төменгі орындарды жиі пайдаланатын жасы үлкен кісілердің арасында үлкен резонанс тудырды. Кешке қарай ҚТЖ бағаның көтерілмейтіні туралы мәлімдеді.

«Жолаушылар тасымалы» АҚ бес коммерциялық пойыздағы жоғарғы және төменгі орындарға жол жүру ақысын сараланған тәсілдеме бойынша пилоттық жобадан бас тартты», – дейді «Қазақстан темір жолы» ҰК» АҚ баспасөз қызметі.

​qazaly.kz​​​