Қазақстан халқының саны өсті

Қазақстан халқының саны өсті, - деп хабарлайды massaget.kz тілшісі Стратегиялық жоспарлау және реформалар агенттігі Ұлттық статистика бюросына сілтеме жасап. 
Ведомство мәліметінше, 1 қазандағы жағдай бойынша, еліміздегі халық саны 19 691,9 мың адам болды, оның ішінде қалалықтар - 12 151,7 мың (61,7 пайыз), ауылдықтар - 7 540,2 мың адам (38,3 пайыз). 2022 жылдың басымен салыстырғанда халық саны 188,7 мың адамға немесе 1 пайызға өсті.
2022 жылғы қаңтар-қыркүйекте республика халқының табиғи өсімі 2021 жылғы қаңтар-қыркүйекпен салыстырғанда  (201,2 мың адам) 1,6 пайызға кеміп, 198 мың адам болды. Табиғи өсімнің жалпы коэффициенті 1000 адамға шаққанда - 13,49 адам.
АХАТ органдары ұсынған азаматтық хал актілерінінің жазбаларындағы мәліметтерге сәйкес, 2022 жылғы қаңтар-қыркүйек аралығында 299,7 мың сәби дүниеге келді, бұл 2021 жылдың тиісті кезеңімен салыстырғанда 11,5 пайызға аз (338,8 мың адам). 1000 адамға шаққандағы жалпы туу коэфициенті - 20,41.
Қарастырылып отырған кезеңде 101,7 мың адам қайтыс болды, бұл 2021 жылдың алғашқы тоғыз айына қарағанда 26,1 пайызға аз (137,6 мың адам). Өлім-жітімнің жалпы коэффициенті 1000 адамға - 6,92 қайтыс болған.
2022 жылғы қаңтар-қыркүйек аралығында республикада 1 жасқа дейінгі 2 453 нәрестенің шетінеуі тіркелді және былтырғы тиісті кезеңмен салыстырғанда (2 682 шетінеген нәресте) көрсеткіш 8,5 пайызға кеміді. Нәресте өлім-жітімінің коэффициенті 1000 туғандарға шаққанда - 8,18 оқиға.