Еңбегі елеулі жастар: «Үздік жастар – 2022» премиясы

Бүгінде елімізде жастарды жан-жақты қолдау аясы кеңінен тарап, оларға біршама мүмкіндіктер қарастырылған болатын. «Жұмыспен қамту – 2020», «Дипломмен ауылға» және «Бизнестің жол картасы» секілді түрлі мүмкіндіктер арқылы жастар өзін және елімізді дамыту үстінде.Жалпы аудан бойынша 18 796 жас болса, бұл дегеніміз жалпы халықтың 24,2 пайызын құрап отыр. Сонымен бірге ауданда арнайы «Жастар ресурстық орталығы» құрылып, қазіргі кезде жүйелі жұмыстар атқарып келеді. «AILAQ» жастар ресурстық орталығы жыл басынан бері түрлі бағыттағы 125 шара  ұйымдастырған еді. Сондай-ақ бұл шараларда аудан бойынша 4837 жас қамтылды. Жыл көлемінде орталық 12 бағыт бойынша жоба әзірлеп, жоба бойынша тұрақты жұмыстар жүргізіліп келеді.
Жыл қорытындысы ретінде орталығымыз аудандық мәдениет үйінде жастар форумын өткізді. Сонымен бірге атаулы форумда аудан әкімі Серік Сермағамбетов әр сала бойынша елеулі еңбек етіп, аудан дамуына өзіндік үлес қосып жүрген жастарға «Үздік жастар – 2022» премиясы табыстаған болатын. Жастар форумында аудан басшысы әр сала бойынша елеулі еңбек етіп, аудан дамуына үлес қосып жүрген үздік жастарды марапаттады. Сонымен бірге «Жас балықшы» Айболат Жаналиев пен «Жас тазалықшы» Фариза Ідірісоваға демалыс шипажайына жолдама табысталды. Аудан басшысы ел тарихының дамуы мен өркендеуі, ертеңгі ел болашағы жастарға байланысты екендігіне тоқталып, оларға беріліп жатқан мүмкіндіктер жайында айтып өтті.
Түрлі-түсті жарықтармен безендірілген сахна төрінде алдымен аудандық «Жастар ресурстық орталығының» атқарған жұмыс нәтижелері мен жетістіктері арнайы бейнеролик арқылы қалың көпшілікке таныстырылды.
Атаулы форум әрі қарай аудан өнерпаздарының өнерлерімен жалғасын тапты. Айтыс саласының майталманы Бексұлтан Орынбасаров аудан жастарына арнау арнаса, Ғазиз Бектұрынов Ш.Қалдаяқов атамыздың әндерінен поппури шашу етті. Өз мәресіне жеткен жастар форумында көрермендер ризашылықтарын білдіріп, алдағы уақытта жалғасын табарына сенім білдірді.

НҰРСҰЛТАН Алдамұратов,
Аудандық жастар ресурстық орталығының қызметкері,
«Жас Толқын» еріктілер тобының жетекшісі