Қазақстандықтар зейнетақы қорынан ақшасын жаппай алып жатыр

Қазақстандықтар зейнетақы жинақтарынан күнделікті қажеттіліктерге жұмсау үшін жаппай қаражаттарын алып жатыр, - деп хабарлайды Massaget.kz тілшісі.

Бірінші несие бюросының мәліметінше, шілде айында Бірыңғай жинақтаушы зейнетақы қорынан 72,1 млрд теңге алынған. Бұл маусым айымен салыстырғанда 81 пайызға өсіп отыр. Ал өтініштер саны 64 пайызға артып, 62,7 мыңға жетті. Негізінен қазақстандықтар зейнетақы ақшасын тұрғын үй салуға (40,5 млрд теңге) немесе емделуге (20,8 млрд теңге) төлеу үшін алған.

"Мұндай көрсеткіш маусым айының соңында басталған зейнетақы алуды қандай да бір жолмен шектеу қажеттілігі туралы пікірталас аясында тіркеліп отыр. Содан кейін Еңбек министрлігі бұл идеяны жалпы мақұлдап, қазақстандықтардың болашағына алаңдаушылық білдірді. Шілде айының басында министрлік көрсеткендей мерзімінен бұрын алуға толық тыйым салу қарастырылмады", - деп түсіндірді Бірінші несие бюросының талдау орталығы.

Шілде айының соңында Денсаулық сақтау министрлігі емделу үшін біржолғы зейнетақы төлемдерін пайдалану қағидаларына түзетулер жобасын қоғамдық талқылауға шығарып, зейнетақы қорынан төленетін қаражатты төлеуге уақытша тыйым салуды ұсынған еді. Өйткені стоматологиялық қызмет көрсететін кейбір емханалар бұл ақшаны төлем желеуімен қолма-қол ақшаға айналдырып отырған.

Сурет: ​kaz.tengrinews.kz​​​