Толқын Tolqyn.kz ақпараттық агенттігі
» » Креатив көшінде

Креатив көшінде

Астана қаласында еліміздегі ең танымал жастар фестивалінің бірі – республикалық «Маусымашар – 2025» ойындары өткен. Биылғы фестиваль «Креативті маусым» тақырыбымен ерекшеленіп, еліміздің түкпір-түкпірінен жиналған 250-ден астам команданың басын қосты. Сонымен қатар, Жайдарманның халықаралық деңгейге шыға бастағанын көрсетіп, ойынға Өзбекстан, Қырғызстан және Әзербайжаннан келген командалар қатысты.Әзіл додасына аудандық оқушылар үйінің «Жайдарман» үйірмесінен «11-лер» және «Дарын» командалары барып, бақ сынады.
Тәжірбиелі жайдарманшы, «Арал-Ас» командасының мүшесі Төребек Дәрмағамбетов жетекшілік ететін «11-лер» командасы жоғары топтағы командалармен сынға түсіп, аймақтық лигаға жолдама алды. Бұл – жас ойыншылар үшін үлкен жетістік, себебі онда тек мықтылардың мықтысы ғана іріктеледі. Команда ойыншылары ширақ ойларымен, сәтті әзілдерімен және сахнадағы серпілісімен қазылар алқасын таңғалдырды.
Ал «Дарын» командасы 12-16 жас аралығындағы мектеп командалары арасында өтетін «Jaidarman Junior» лигасында ойын көрсетіп, 54 команда ішінен үздік 24 команда тізіміне кіріп, Алматы қаласына жолдама алды.
– Жайдарман – еліміздегі танымал жастар ойындарының бірі. Ол тек әзіл-қалжың алаңы ғана емес, жастардың шығармашылық қабілетін шыңдайтын, шапшаң ойлауға үйрететін, шешендік өнерін дамытатын маңызды жоба. Ойын КВН стилінде өтеді, бірақ ол қазақы болмысқа жақындылығымен айрықша. Әр маусымда жүздеген команда өзара сынға түсіп, үздік әзілдері мен тапқырлығы арқылы халықтың ықыласына бөленеді, – деді  Төребек Дәрмағанбетов
Ауданның атын шығарып, абыройын асқақтатқан жас ойыншылардың «Маусымашардағы» жетістігі жеңісті күндердің бастамасы деп сенеміз.
Г.САҚТАПОВА
01 сәуір 2025 ж. 116 0