Аймақ абыройын асқақтатқан Айжан

Аудандағы білім саласы жетістіктерге толы. Солардың бірі – таяуда ғана көпшілікті қуантқан сүйінші жаңалықты аралдықтарға жеткізбекшіміз. Жыл басында жаңадан пайдалануға берілген "Жайлы мектеп" ұстаздарының абыройы артып, баршаны қуантып отыр. Нақтырақ тоқталсақ Қазақстан Республикасы Оқу - ағарту министрлігінің «Дарын» республикалық ғылыми – практикалық орталығының ұйымдастыруымен Семей қаласында 2025 жылдың 27-28 наурыз күндері «Математикалық регата – 2025» республикалық олимпиадасында аталған №292 орта мектебінің математика пәні мұғалімі Айжан Сағындық Қызылорда облысының «Қорқыт» командасының қатарында болып, бас жүлде иеленді. Математика пәні мұғалімдерінің кәсіби қызметіндегі жоғары нәтижелерге жетудегі ұмтылысын арттыру мақсатында өткен олимпиадада Қызылорда қаласы №271 орта мектебінің математика пәні мұғалімі Бағдәулет Серік, Шиелі ауданы №214 орта мектебінің математика пәні мұғалімі Батырбек Қалмахан, Қызылорда қаласы №9 «Білім-инновация» лицей-интернатының математика пәні мұғалімі Аманер Ахметтермен бірге Сыр ұстаздарының мерейін асырды.

Айта кетейік Айжан Серікқызы Ақтөбе облысының тумасы. 2018 жылы Қ.Жұбанов атындағы Ақтөбе өңірлік мемлекеттік университетін үздік дипломға бітірген ол ұлағатты ұстаздық қызметін Ақтөбе облыстық мамандандырылған физика-математикалық мектеп-интернатынан бастап, 2019 жылы 1 қыркүйектен бері Арал қаласындағы Ж.Әбдірашев атындағы #62 мектеп-лицейінде білімді шәкірт дайындау жолында табысты жұмыс жасады. Жоғарыда атағанымыздай биыл ақпан айынан бастап #292 орта мектепке орналасқан Айжан 7 жылдық қызметтік кезеңде педагог-сарапшы санатына қол жеткізіп үлгерген. Осыған дейін де аудандық “Үздік математика пәнінің мұғалімі”, “Математикалық регата” олимпиадасының аудандық және облыстық кезеңдерінің жеңімпазы болған оның оқушылары да  білім додаларында жүлдегер атанып жүрді.

Міне, бүгінде аймақ математиктерінің атын айға шығарған Айжаннан алдағы уақытта да күтеріміз көп.

Оңталап ЖОЛДАСОВ