Бүгін елімізде ауа райы қандай болады

"Қазгидромет" РМК бүгінге, 12 маусымға арналған ауа райы болжамын жариялады, деп хабарлайды BAQ.KZ .

Синоптиктердің болжамынша, еліміздің көп бөлігінде оңтүстік циклонның әсерінен жаңбыр жауып, найзағай ойнайды. Солтүстік-батыс өңірлерде жаңбыр күшейіп, кей жерлерде бұршақ жаууы мүмкін. Сонымен қатар республиканың көптеген аймақтарында жел күшейіп, оңтүстікте шаңды дауыл мен қатты дауыл болады. Оңтүстік-батыста түнде және таңертең тұман түседі. Тек шығыс өңірде антициклон әсерінен жауын-шашынсыз ашық ауа райы сақталады.

Бірқатар өңірлерде жоғары және төтенше өрт қаупі сақталады. Атап айтқанда, Алматы, Қарағанды, Ұлытау, Жетісу, Абай облыстарының, сондай-ақ Ақтөбе, Ақмола, Жамбыл, Қостанай, Маңғыстау, Батыс Қазақстан, Солтүстік Қазақстан, Павлодар және Шығыс Қазақстан облыстарының кей бөліктерінде өрт қаупі жоғары. Ал Қызылорда, Түркістан, Атырау облыстары мен тағы бірнеше аймақта төтенше өрт қаупі күтіледі.

Күндіз Жетісу, Абай, Алматы, Батыс Қазақстан және Атырау облыстарында аптап ыстық орнайды. Ауа температурасы 35-38 градусқа дейін көтерілуі мүмкін.

Фото: Нұрболат Нұржаубай