Аптап ыстық: елдің бірнеше өңірінде ескерту жарияланды

"Қазгидромет" РМК бүгін, 4 шілдеде еліміздің бірқатар өңірінде ауа райына байланысты ескерту жариялады, деп хабарлайды BAQ.KZ.

Синоптиктердің болжамынша, бүгін ел аумағында найзағай, бұршақ, дауыл, шаңды дауыл, қатты ыстық болады.

Астанада найзағай, бұршақ, шаңды дауыл күтіледі. Желдің екпіні 25 м/с-ке дейін жетеді. Күндіз 35°С ыстық болады.

Маңғыстау облысында түнде шаңды дауыл тұрып, күндіз 40°С-қа дейін ыстық. Бірқатар аймақта жоғары және төтенше өрт қаупі сақталады.

БҚО-да тұман, күндіз найзағай мен бұршақ күтіледі.

Атырау облысының батысы мен оңтүстігінде өрт қаупі жоғары.

Ақмола облысында қатты жаңбыр, найзағай, бұршақ пен дауыл болады. Желдің екпіні 28 м/с-ке дейін жетуі мүмкін.

Қызылорда облысында шаңды дауыл соғып, ауа температурасы 44°С-қа дейін көтеріледі.

Ақтөбе, Қостанай, ШҚО, Абай, Ұлытау, СҚО, Жамбыл, Қарағанды, Павлодар, Жетісу облыстарында да қолайсыз метеожағдайлар: найзағай, бұршақ, қатты жел мен аптап ыстық күтіледі. Бірқатар аймақта өрт қаупі өте жоғары.

Төтенше жағдайлардан сақ болу үшін тұрғындарға сақтық шараларын қатаң ұстану ұсынылады.

Фото: Нұрболат Нұржаубай