“QAISAR” ӘСКЕРИ САЛА МАМАНДАРЫ ЖАСӨСПІРІМДЕРГЕ АРНАЛҒАН ШЕБЕРЛІК САҒАТЫН ӨТКІЗДІ
Бүгін “QAISAR” әскери-патриоттық жобасы аясында білім беру ұйымдарының жас өрендеріне арналған мазмұнды шара ұйымдастырылды. Жобаға қолдау көрсетіп отырған әскери сала мамандары оқушылармен арнайы кездесіп, әскери дайындықтың қыр-сырын таныстыратын шеберлік сағатын өткізді.Іс-шараның негізгі мақсаты – жас буынға отаншылдық рухты дарыту, елдің қорғаныс саласына деген құрметті арттыру және әскери тәртіптің маңызын түсіндіру. Кездесу барысында мамандар әскери қызметтің күнделікті талаптары, жауынгерлік дайындық кезеңдері, қару-жарақпен жұмыс істеу мәдениеті жөнінде кеңінен баяндады.
Шеберлік сағаты интерактивті түрде өтті. Қатысушыларға тактикалық дайындық элементтері көрсетіліп, қауіпсіздік ережелері мен алғашқы медициналық көмекті дұрыс көрсету тәсілдері іс жүзінде үйретілді. Сонымен қатар жастарға әскери формадағы жабдықтардың құрылымы, оның қолданылу ерекшеліктері түсіндірілді.
Жобаға қатысқан өрендер мамандардың әңгімесін ықыласпен тыңдап, өздерін қызықтырған сұрақтарын қойды. Әскери қызметшілер жастарға болашақ мамандықты дұрыс таңдауда патриоттық сана мен азаматтық жауапкершіліктің орны ерекше екенін атап өтті.
“QAISAR” жобасы алдағы уақытта да жас буынға бағытталған түрлі әскери-патриоттық іс-шараларды жалғастыра бермек. Мұндай кездесулер өскелең ұрпақтың Отан қорғау ісіне деген көзқарасын қалыптастыруда маңызды рөл атқарады.
