Технологиялық жаңғыру мен цифрландыру – ел дамуының негізі

Ауыл әкімдері диалог платформасы аясында Мемлекет басшысы Қасым-Жомарт Тоқаевтың соңғы мәлімдемелерін тыңдап, елдің технологиялық жаңғыру мен цифрландыру бағытында үлкен қадамдар жасауы керектігіне тағы бір рет көз жеткіздім. Мен үшін ең маңыздысы – Президенттің бұл мәселелерді стратегиялық тұрғыдан қарастырып, нақты іс-қимыл жоспарын ұсынуы болды. Президент мысал ретінде АҚШ-та жасанды интеллектіні дамытуға арналған бірыңғай платформаны атап өтті. Бұл жүйе ғылыми зертханалар, дата орталықтар, цифрлық модельдер және суперкомпьютерлер желісін біріктіріп, жаңа технологиялар мен материалдарды әзірлеуге тың серпін береді. Мұндай тәжірибе Қазақстанға өз цифрлық инфрақұрылымын жетілдіруде жақсы сабақ бола алады. Әлбетте, Қазақстан жаһандық көшбасшы болуға ұмтылмаса да, өркениет көшінен қалмай, технологиялық жаңғыруды жеделдету – ел дамуы үшін маңызды. Сонымен қатар Президент ауылдық округтер мен елді мекендерді цифрландырудың маңыздылығын ерекше атап өтті. Менің ойымша, «Цифрлық Қазақстан» жобасын ауылдарсыз жүзеге асыру мүмкін емес. Ауыл әкімдері ақпараттық платформаларды тиімді пайдалана отырып, жергілікті тұрғындардың мәселесін уақытында анықтап, шешім қабылдауға атсалысуы керек. Бұл тұрғындардың өмір сүру сапасын теңестіру және жергілікті басқарудың тиімділігін арттыруда шешуші рөл атқарады. Тағы бір маңызды мәселе – «Халық үніне құлақ асатын мемлекет» тұжырымдамасы. Ауыл әкімдері мен жергілікті билік азаматтардың өтініштері мен ұсыныстарына нақты жауап беруі тиіс. Өтініштердің көбі жол, аула, балалар алаңы сияқты күнделікті өмірге қатысты инфрақұрылымдық мәселелерге арналғанын көріп отырмыз. Сол себепті әр әкім өз өкілеттігін толық пайдаланып, азаматтардың сенімін арттыруға тырысуы керек. Жеке пікірім бойынша, бұл жолға қойылған басымдықтар – елдің болашағын қамтамасыз етудің нақты қадамдары. Технологиялық жаңғыру мен цифрландыру арқылы Қазақстан ауыл мен қаланы теңестіреді, жергілікті басқарудың тиімділігін арттырады, ал азаматтардың сенімін нығайтады. Мұндай жүйелі жұмыс – еліміздің дамуы мен әлемдік аренада орнықты беделге ие болуына тікелей ықпал етеді.