Бақытты отбасы: Отбасы құндылықтары жөнінде тәрбие сағаты өткізілді
“Орталық” бастауыш партия ұйымы “Бақытты отбасы” партиялық жобасы аясында өскелең ұрпақтың тәрбиесіне, отбасындағы өзара сыйластық пен түсіністікке бағытталған маңызды шара – ата-ана мен бала арасындағы қарым-қатынас тақырыбында дөңгелек үстел форматында тәрбие сағатын өткізді. Іс-шараға мектеп оқушылары қатысып, отбасы құндылықтары жөнінде өз ой-пікірлерімен бөлісті.Тәрбие сағатының негізгі мақсаты – ата-ана мен бала арасындағы қарым-қатынастың маңыздылығын түсіндіру, отбасындағы сыйластық, жауапкершілік, мейірім мен сенім ұғымдарын жасөспірімдердің санасына сіңіру, сондай-ақ баланың тұлға ретінде қалыптасуындағы ата-ананың рөлін кеңінен ашу болды.
Шара барысында ұйымдастырушылар отбасы – қоғамның тірегі, ал ата-ана мен бала арасындағы дұрыс қарым-қатынас бақытты болашақтың негізі екенін атап өтті. Қатысушыларға отбасы ішіндегі өзара түсіністік, ашық әңгіме, бір-біріне қолдау көрсету, баланың пікірін тыңдау секілді құндылықтар туралы кеңінен түсіндірілді.
Дөңгелек үстел барысында оқушылар белсенділік танытып, өз отбасыларындағы қарым-қатынас, ата-анамен арадағы байланыс, күнделікті өмірде кездесетін қиындықтар мен оларды шешу жолдары жөнінде ойларын ортаға салды. Сонымен қатар, түрлі жағдаяттық сұрақтар қойылып, балалар өз көзқарастарын еркін жеткізуге мүмкіндік алды.
"Толқын" ақпарат
