Аралдағы байланыс сапасы артып келеді
Қазіргі таңда цифрландыру мен жаһандану үдерісі әлем елдерінің даму бағытын айқындайтын негізгі факторлардың біріне айналды. Ақпараттық технологиялардың дамуы, интернет жылдамдығы мен қолжетімділігі – қоғамның әлеуметтік-экономикалық деңгейін көрсететін маңызды өлшемдердің қатарында. Осы тұрғыдан алғанда, елімізде телекоммуникация саласын дамытуға ерекше көңіл бөлініп келеді. Бұл бағытта Қазақтелеком акционерлік қоғамы көшбасшы компаниялардың бірі ретінде халыққа сапалы әрі қолжетімді қызмет ұсынып отыр.Арал ауданында да байланыс саласы соңғы жылдары айтарлықтай ілгерілеген. Аудан тұрғындарын тұрақты байланыспен қамтамасыз етіп отырған негізгі құрылым – «Қазақтелеком» АҚ-ның аудандық желілік техникалық цехы. Көпжылдық тәжірибесі бар бұл бөлімше бүгінгі күні заман талабына сай жұмыс істеп, жаңа технологияларды енгізу арқылы қызмет сапасын арттыруға басымдық беруде.
Үздіксіз қызмет – басты міндет
Арал аудандық желілік техникалық цехы бірнеше бағыт бойынша халыққа қызмет көрсетеді. Олардың қатарында стационарлық телефон байланысы, кең жолақты интернет, цифрлық теледидар (IPTV), деректерді тарату және корпоративтік желілер бар. Бұл қызметтер тек тұрмыстық қажеттіліктерді өтеумен шектелмей, ауданның әлеуметтік және экономикалық дамуына да тікелей ықпал етуде.
Бөлімше басшысы Дәулет Мырзағұловтың айтуынша, мекеме құрылымы екі негізгі бөлімнен тұрады. Сату бөлімінде абоненттермен жұмыс жүргізіліп, жаңа тарифтер мен қызмет түрлері ұсынылады. Ал техникалық бөлім байланыс желілерін жаңарту, жөндеу және ақауларды жою жұмыстарымен айналысады. Қазіргі таңда мамандар бағаналарды жаңарту, желілерді ретке келтіру және нөмірлеу жұмыстарын жүйелі түрде жүргізуде.
– Арал ауданы бойынша бүгінде 7048 абонент тіркелген. Оның 5674-і интернет қызметін пайдаланып отыр. Сонымен қатар 1441 абонент цифрлық теледидарға қосылған. Ұялы байланыс қызметтері бойынша да тұрғындар белсенді – 6127 абонент Kcell және Altel операторларының SIM-карталарын қолданады, – дейді бөлімше басшысы.
Цифрландыру – даму кепілі
Соңғы жылдары елімізде жүзеге асырылып жатқан цифрландыру саясаты аясында Арал ауданында да ауқымды жұмыстар қолға алынған. Атап айтқанда, интернет желісінің жылдамдығын арттыру, оптикалық талшықты байланыс желілерін тарту, ауылдық елді мекендерді қамту бағытында нақты жобалар іске асырылуда.
Бүгінде ауданның көптеген ауылдарында жоғары жылдамдықты интернетке қол жеткізу мүмкіндігі артып келеді. Бұл – әсіресе шалғай елді мекен тұрғындары үшін үлкен жетістік. Бұрын интернет сапасының төмендігіне байланысты қиындықтар туындаса, қазір бұл мәселе біртіндеп шешімін табуда.
Интернеттің кеңінен қолжетімді болуы білім беру саласына да оң әсер етті. Оқушылар мен студенттер онлайн форматта білім алып, түрлі цифрлық платформаларды еркін пайдалана бастады. Сонымен қатар мемлекеттік қызметтердің басым бөлігі электронды форматқа көшкендіктен, тұрғындардың уақыт үнемдеуіне де мүмкіндік туып отыр.
Кәсіпкерлікке жаңа мүмкіндік
Байланыс сапасының артуы аудан кәсіпкерлері үшін де жаңа мүмкіндіктер ашуда. Интернет арқылы тауар сату, онлайн қызмет көрсету, жарнама жасау секілді заманауи тәсілдер кеңінен қолданылып келеді. Бұл шағын және орта бизнестің дамуына оң ықпал етіп отыр.
Әсіресе соңғы жылдары әлеуметтік желілер мен онлайн сауда алаңдарын пайдаланатын кәсіпкерлер саны артқан. Бұл өз кезегінде аудан экономикасының жандануына әсер етуде.
Қызмет сапасы – басты назарда
Арал аудандық желілік техникалық цехының басты құндылығы – кәсіби білікті мамандар. Қызметкерлер үнемі өз білімдерін жетілдіріп, жаңа технологияларды меңгеруге ұмтылады. Тұтынушыларға сапалы қызмет көрсету – бөлімше жұмысының негізгі басымдығы.
Абоненттердің өтініштері мен шағымдары жедел қаралып, техникалық ақаулар қысқа мерзімде жойылады. Сонымен қатар тұтынушылармен кері байланыс орнату, түсіндіру жұмыстарын жүргізу, жаңа қызмет түрлерін таныстыру жүйелі түрде жүзеге асырылып келеді.
Бұл жұмыстар халықтың компанияға деген сенімін арттырып, қызмет сапасына оң баға беруге негіз болуда.
Әлеуметтік жауапкершілік және келешек жоспар
Бөлімше тек коммерциялық қызметпен шектелмей, әлеуметтік жауапкершілік бағытында да белсенді жұмыс жүргізуде. Атап айтқанда, мектептер, медициналық мекемелер және мемлекеттік ұйымдарды сапалы интернетпен қамтамасыз етуге ерекше көңіл бөлінеді. Сонымен қатар цифрлық сауаттылықты арттыру бағытында да түсіндіру жұмыстары жүргізілуде.
Алдағы уақытта Арал ауданында интернет сапасын одан әрі жақсарту, жаңа цифрлық қызметтерді енгізу және қолданыстағы инфрақұрылымды жаңғырту жоспарланып отыр. Бұл жұмыстар аудан тұрғындарының өмір сүру сапасын арттырып қана қоймай, өңірдің цифрлық даму деңгейін жаңа сатыға көтермек.
Арал ауданындағы байланыс саласының бүгінгі қарқыны – жүйелі еңбектің нәтижесі. Алдағы жоспарлар толық жүзеге асқан жағдайда, аудан тұрғындары үшін сапалы әрі қолжетімді цифрлық қызметтер одан әрі жетілдіріле түсетіні анық.
Назерке МАРАТҚЫЗЫ
