"Алласын танығанына біраз болды": Досы Берік Айтжановтың құпиясын ашып қойды

Өзі де, дауысы да, қылығы да тәтті актриса Күнсұлуға қыздары ұқсаса деп армандайтын дос, бауыр, әріптестері өте көп. Бүгінде актрисаның отызға жуық кіндік баласы бар. «Кіндік шешенің міндеті аз емес қой. Оның екі дүниеде жауапкершілігі көп. Ол баланың дұрыс жүруі, тәрбиесіне де мән беру ата-анасынан бөлек кіндік әке-шешеге де жүктеледі. Ата-анасының қолынан келмеген кей материалдық, моральдық жағдайларға да қолдау көрсету кіндік әке-шешенің парызы секілді қалыптасқан. Көп адамдар кіндік анасы болсаңыз деп айтады. Бірақ, мен мәдениетті түрде бас тартамын», -  дейді. 
Айтпақшы, талғамы да, гонорары да өте қымбат актер Берік Айтжановтың ерке қызының да кіндік анасы атаныпты.
«Менің дос қызым Әйгерім Берік Айтжановтың жолдасы.  Достықтан бөлек туыстық қарым-қатынасты арттыру мақсатында олардың да қыздарына кіндік шеше болдым», - дейді актриса. 
Достарының жетістіктеріне әрдайым қуанатын актриса алғаш рет әріптесі Берік туралы сырды ақтарды. 
«Беріктің тура жолға түсіп, намаз оқып, Алласын танығанына да біраз болды. Берік өте айқайлап жақсылық жасайтын адам емес. Өте қарапайым әрі ұялшық адам. Бүгін ғана бір таныстарымыз баласының тұсауын Берікке кестірсек деп хабарласты. Мен сол өтініштерін жеткізген кезде Берік «Мен баланың тағдырына араласып, тұсауын кесетін жағдайға жеттім деп ойламаймын. Әлі де болса иманымды күшейтіп алайын. Кейін бір реті болар, Көнебай» деп қояды. Ал, Әйгеріммен жақсы сырласамыз», - деді ол.
Кезекті кездесуде Әйгерім жолдасының шешімі туралы қобалжып құрбысымен бөліскен. Сол сырды бүгін Күнсұлу ханым алғаш рет оқырманмен ортақтасуды жөн санады. 
«Әңгіме барысында бір рөлден бас тартқаны туралы айтып қалды. «Бір мұсылман-терроистің рөлін ұсынған. Қаржысы өте қомақты. Бірақ, ол рөлден бас тартты» деп қуаныштан жылап айтқан еді. Біз гонорардың бағасын емес, иманның өскені туралы айттық. Соған қуандық. Бәлкім, рұқсатсыз құпиясын көпке айтқаным үшін ренжитін шығар. Алайда, ақшаны емес, адамгершілікті биік қоя білген игі жақсы қадамды жария еткен абзал деп ойлаймын. Жақсының жақсылығын айт – нұры тассын деген осы шығар», - дейді Күнсұлу Тұрғынбекқызы.

https://stan.kz