Алаяқтарға алданған қазақстандық 11 млн теңгесінен айырылды

Ақмола облысының тұрғыны алаяқтарға алданып, 11 млн теңге шығынға ұшырады, - деп хабарлайды Massaget.kz тілшісі.

Алаяқтар цифрлық технологиялардың көмегімен азаматтардың ақшасын жымқырудың жаңа тәсілдерін тауып жатыр. Танымал әдістердің бірі - жалған инвестициялық платформалар.

Былтыр 21 желтоқсанда Қосшы қаласының тұрғыны Google-дан инвестициялар туралы жарнама көріп, өтініш қалдырған. Жарты сағаттан кейін оған "менеджер" хабарласып, валюта айырбастау үшін сайтқа сілтеме жіберген. Платформаның жұмысын шағын аудармамен тексергеннен кейін ер адам оған сеніп, 100 мың теңге инвестициялаған.

"Кейінірек ол үлкен мәмілелер ұсынған трейдер әйелмен байланысқан. 22 желтоқсанда ол 1 млн 600 мың теңге үлес қосқан, ал көп ұзамай 140 мың долларлық пайда көрген. Алайда ол бұл ақшаны ала алмаған, ал қолдау қызметі сақтандыруға қосымша ақша салу керек екенін айтқан. Ер адам қарыз алып, ақшаны аударған, бірақ одан әрі жаңа талаптар келді: "операциялар тізбегіндегі қатені" түзету, "салық кодын" төлеу және жеке кабинеттің "бұғаттауын ашу". Нәтижесінде ол бірнеше рет қарыз алып, оны алаяқтарға аударды. Шығын сомасы 11 миллион теңгеге жеткенде ақмолалықтың парақшасы бұғатталған", - деп жазылған полиция хабарламасында.

Алаяқтың құрбаны болғанын түсінген ауыл тұрғыны 23 қаңтарда полицияға жүгінген.

Ақпарат көзі: massaget.kz
Фото: Нұрболат Нұржаубай