Жәнібектің жарқын жеңісі

Бокс әлемінде қазақтың маңдайына біткен тағы бір жарық жұлдыз пайда болып келеді. Ол қаны да, жаны да қазақ – Жәнібек Әлмұханұлы. Күрзі жұдырық, құрыш қолды қазақ баласының қарсылас шыдатпай келе жатқаны бізге мәлім болатын. Енді оны әлем мойындап жатыр. Жақсы емес пе?! Өткен аптада біз сөз еткен Жәнібек орта салмақта Бүкіләлемдік бокс қауымдастығының (WBO) тұжырымы бойынша «уақытша» әлем чемпионы атанды. Осы кезге дейін 15 кездесу өткізіп, барлығында жеңіске жеткен британдық былғары қолғап шебері Дигнумды алғашқы раундта нокаутқа жіберсе, 2 раундта оперкуд әдісімен нокаутқа түсірді. Осылайша төрткүл дүние көз тіккен Лас-Вегас төріндегі тартысты кездесу Жәнібектің жарқын жеңісімен аяқталып отыр. Бұл нағыз қазақтың қандай болатынын бүкіл әлемге танытуда тағы бір дәлел болса керек. Бұл жекпе-жек кәсіпқой боксқа қадам басқан қандасымыздың мансабындағы 12 жеңісі. Сол жеңісті сәтте ана тілінде сөйлеген Жәнібек:– Біріншіден, барлық жанкүйерлерге алғысым шексіз, осылай қолдап келіп отырғанына. Біздің бұл әлі қатты ұрған соққымыз емес. Біз енді бастап жатырмыз. Енді келіп жатырмыз. Құдай қаласа, бұдан да өте жақсы, өте ауыр соққылар болады, – деді.
Әлем назарын аударған айтулы кеште қайсар рухты халықтың тектілігін тағы бір мәрте дәлелдей түскен батыр ұлдың тіл мәселесіне келгенде төрелік танытып, ана тілінде сөйлеуі сүйсіндірді бізді. Әйтпесе шет ел көрсе туған тілін ұмытып, басқаның тілінде бөсіп тұратындар баршылық қой. Біз осы тіл мәселесінде Жәнібектей ұлдарды көпке үлгі етуіміз керек.
Отандасымыздың әлем чемпионы деген атқа уақытша ие болуына себеп те жоқ емес. Себебі орта салмақта WBO әлем чемпионы титулы америкалық  Деметриус Андрадеде (31-0, 19 КО) тиесілі. Ал оны ұйым Әлімханұлымен жұдырықтасуға міндеттеген. Егер америкалық жекпе-жектен бас тартса, Әлімханұлы титулды жекпе-жексіз жеңіп ала алады. Сол сәттен бастап жалпақ дүние назарына Жәнібек деген есім ілігетін болады. Ол үшін отандасымызға әлі еңбектеніп, түрлі титулдар бойынша табысты өнер көрсету ләзім. Бұл мәселеде Ж.Әлмұханұлы еліміздің атын шығарып жүрген тағы бір боксшымыз Геннадий Головкинмен жұдырықтаса ма деген сұрақ туындайды. Бұл сұраққа жауап та дайын.
Негізі, қазақтың салт-дәстүрі бойынша үлкендерді кішілер жекпе-жекке шақырмайды. Сондықтан ол кісіні сыйлаймыз. Ол болашақта 168-ге ауысады деп ойлаймын. Мен ол боксшымен жұдырықтаспаймын,– деді Жәнібек.

А. ҚАРАСАЙ