Ресей — Қазақстан: Еуро-2020 іріктеу матчын қашан және қайдан көруге болады
"Калининград" стадионында өтетін Қазақстан мен Ресей құрамаларының матчына билеттердің барлығы дерлік сатылып кеттіЕуропа 2020 чемпионатының іріктеу кезеңінде Қазақстан құрамасы қонақта Ресей командасымен кездеседі.Матч Нұр-Сұлтан уақытымен қыркүйектің 9-ынан 10-ына қараған түні сағат 00:45-те өтеді, Qazsport арнасы тікелей трансляцияны көрсетпек.
Кездесу 35 мыңнан астам көрерменге арналған "Калининград" стадионында болады. Матч аншлагпен өтеді деп жоспарланған.
Қазақстан құрамасының бас бапкері Михал Билек нәтижеге ықпал ететін біраз құпияны ашты.
"Ресей құрамасының Шотландиядағы ойынын көрдік, ресейліктер алаңның ортасында доптан айырылса да, қайта тартып алатынын байқадық. Асығыстық жасап, қателік жібермеуге тырысамыз. Бірақ қорғаныста ғана жатпай, реті келгенде шабуылға шығып, ұтымды сәтті пайдалануға талпыныс жасаймыз", - деді Билек тілшілерге.
Ресей құрамасы I тобында 12 ұпаймен екінші орында тұр. Бірінші орында - Бельгия құрамасы, ал Қазақстан 7 ұпаймен үшінші орында.
Бұған дейін Қазақстан Кипр командасымен теңбе-тең ойнаған болатын, есеп – 1:1.
