Ауызсу шешімін тауып келеді

Мемлекет елді мекендерді таза ауызсумен қамту мәселесін күн тәртібіне қойғалы бірнеше жылдың жүзі болды. Бұл бастама бүгінде біраз нәтиже беріп, ауызсу тұтынатын ауылдардың қатары артты. Іргелі істер біздің ауданда да біршама жолға қойылды. Айталық, аудандағы 57 елді мекеннің 62 пайызы сапалы ауызсумен қамтылған. Ал, 13  ауыл шахталық құдықтан су ішсе, екі ауыл тіршілік нәрін тасымал арқылы тұтынады. Айта кету керек, солтүстік  аудандардағы 150 мыңнан астам халыққа ауызсу таратып отырған «Арал-Сарыбұлақ» топтық су құбыры Қосаман ауылында орналасқан. Мұнда отыз ұңғыма бар. Қазіргі күні қажеттіліке байланысты жетеуі ғана жұмыс істеп тұр. Бас мұнарадан тәулігіне жеті мың тонна су жіберіледі.Еліміздегі ең таза ауыз су Арал ауданында. Бірақ теңізді өлкеде тіршілік нәріне әлі күнге дейін қол жеткізе алмай отырған ауылдар бар. Тұрғындарды толғандырған түйткілді алдағы екі-үш жылдың көлемінде шешу көзделіп отыр. Жалпы құны 6,7 миллиард теңге болатын екі жоба Үкіметтің 2021-2022 жылдарға арналған жоспарына енді.
Қосаман елді мекенінде «Арал-Сарыбұлақ топтық су құбырының» кешенді жоспарына сәйкес жыл сайын жөндеу жұмыстары жүр­гізіледі. Бүгінгі таңда бес су ұңғымасы жөндеуден өтуде, таяуда аяқталады деп жоспарланып отыр. Тиісті мекемелердің мәліметінше, алыс ауылдарға ауызсу құбырларын жүргізу үшін арнайы жоба дайындап, үкіметке ұсынылған.
Аудан әкімі Мұхтар Оразбаев ресми ақпарат көздеріне берген мәліметінде ірі жобалардың қолдау тапқанын айтты.
– Үкіметтің кешенді жоспарында Арал ауданынан екі үлкен жоба қамтылды. Жалпы құны 6,7 млрд теңге болатын «Тоқабай-Жақсықылыш-Абай, Қосаман-Ақеспе-Ақбас­ты» бағытында ауызсу құбырларын жүргізу және су айдау станцияларын салу. Қазір Үкіметтің 2021-2022 жылдарға арналған жос­парына енді, – деді аудан әкімі.
Айта кетсек, биыл Сексеуіл кентіндегі барлық үйге су құбыры жүргізілсе, келесі жылы Шөміш стансасына ауызсу беріледі. Ол үшін республикалық бюджеттен 428 миллион теңге қаржы бөлінбек.
«Толқын» ақпарат