Қос басылымға 90 жыл
Ақпарат айдынында айшықты орны бар «Сыр медиа» ЖШС-ға қарасты облыстық «Сыр бойы» және «Кызылординские вести» газетеріне биыл 90 жыл толып отыр. Өңірдің дамуы мен экономикалық әлеуетін насихаттап, ақпарат саласына тың жаңалықтарымен түрен салып жүрген аға басылымдардың мерейтойын атап өту шарасы әлдеқашан басталып кеткен-ді. Жыл бойы өткен түрлі іс-шаралардың баршасын қоспағанда облыс орталығында бастау алған бүгінгі тойдың жөні басқалардан бөлек. Аймақ әспеттеп, құрмет білдіріп жатқан басылымдар ғасырға жуық уақыт ішінде талай жанның іздеп оқитын басылымы, қала берді жаңалықтардың жаршысына айналып үлгерді. Бүгінде 100 мыңдаған оқырманы бар бұл басылымдардың республика бойыша басқалардан беделі биік, шоқтығы жоғары. Сонау жылдардан сыр шертетін том-том тігінділер, сарғайған беттердің сағыныш сыйлар сазды сырлары да өз заманында оқырман оясынан табылып тұрғанын жұрт жақсы біледі.Журналистика деп аталатын жоталы мамандықтың жілігін шағып, майын ішкен майталман мамандардың тәжірибесін шыңдап, өмір мектебіне айналған аға басылымдарға құрметіміз қашанда ерекше. То-том тарих пен мәдениеттің, өнер мен әдебиеттің алтын ордасына айналған бас басылымдардың бұдан былай да беделі аласармақ емес. Қоғам үнін мұқым елге жеткізіп, сырлы да сұлу сөзбен билік пен халықтың арасындағы алтын көпірге айналып келе жатқан аға басылымдардың мерейлі мерекесі құтты болсын.
Халықтың көзі, тілі, Ахметше айтқанда һәм құлағы болып келе жатқан «Сыр бойы» және «Кызылординские вести» газеттерінің бүгін тағы бір мәрте облыс орталығында мерейі өсіп, мәртебесі асқақтады. Оған бүгін ғана А.Тоқмағамбетов атындағы мәдениет үйінде өткен облыстық «Сыр бойы» және «Кызылординские вести» газеттерінің 90 жылдығына арналған «Заманауи медиа кеңістіктегі аймақтық баспасөздің маңызы мен рөлі» атты облыстық ғылыми-тәжірибелік конференция дәлел. Аймақ басшысы арнайы қатысып, құрмет білдірген қос басылымның алдағы ғұмырына біз де зор жетістіктер мен биік бедел тілейміз. Облыс абройын асқақтатып тұрған облыстық басылымдардың шығармашылық құрамына, барша әріптестерге зор құрмет білдіре отырып, көңілімізден шыққан жақсы тілектерімізді жолдаймыз. Әрқашан қаламдарыңыз ұшталып, шығармашылықтарыңыз шыңдала берсін!
Арал аудандық «Толқын» газеті ұжымы.
