Мемлекет басшысының Жолдауындағы басым бағыттар түсіндірілді

Арал аудандық сотында Мемлекет басшысының 2 қыркүйек 2019 жылы Қазақстан халқына арнаған Жолдауын түсіндіру бойынша судьялар мен сот қызметкерлерінің арасында дөңгелек үстел өткізілді.Шара барысында аудандық сот төрағасының міндетін атқарушы Н.Бекетаев Қазақстан Республикасы Президентінің «Сындарлы қоғамдық диалог-Қазақстанның тұрақтылығы мен өркендеуінің негізі» атты Жолдауының сот жүйесіне қатысты басым бағыттарына тоқталып, сот төрелігін іске асыру сапасын жақсарту, бірыңғай сот тәжірибесін орнықтыру, сондай-ақ азаматтардың сот жүйесіне сенімінің деңгейін көтеру мен сот имиджін арттыру бойынша жүргізіліп жатқан сот жүйесіндегі бірқатар реформалар азаматтарымыздың құқықтарын қорғаудың және олардың қауіпсіздігін күшейтудің негізгі факторы болып табылатынына назар аудартты.
Сондай-ақ, Жолдауда әкімшілік әділет құрылымын енгізу, дәлелдемелерді жинақтау міндеті, заңнамадағы қарама-қайшылықтар мен дүдәмал тұстардың азаматтардың мүдделерін ескере отырып, түсіндірілуі, ауыр қылмыстарға қатысты жазаны күшейту, оның ішінде, жыныстық зорлық-зомбылық, педофилия, есірткі, адам саудасы, браконьерлік қылмыстар бойынша, сондай-ақ, сыбайлас жемқорлықпен жан-жақты күресу  мәселесі тапсырылғанын айтып өтті.
Шара соңында Н.Бекетаев қоғамдық диалог, ашықтық, адамдардың мұң-мұқтажына жедел назар аудару мемлекеттік органдар қызметінің негізгі басымдықтары болып саналатынын, сондықтан халықпен тиімді кері байланыс орнату бойынша жүйелі жұмыстарды жүргізу қажеттілігін баса айтты.
Арал аудандық сотының баспасөз қызметі.