ҚР президенті Қасым-Жомарт Тоқаев Қазақстанның заңнамасына қайшы шетелдік көліктерді елге кіргізбеуді тапсырды, деп хабарлайды  Stan.kz ақпарат агенттігі inform.kz сілтеме жасап.

«Біздің азаматтар Ресей мен Қырғызстаннан сенімхат арқылы көліктерді сатып ала береді. Кейін сол көліктерін біздің елде тіркемей, айдап жүреді. Өз азаматтарымыз Қазақстанның заңнамасын бұза отырып, техникалық құжаттарды ресімдейді. Елге кіргізіліп жатқан ондай көліктердің көбі есепке тіркелмейді. Олардың саны он мыңдаған саннан асып кетеді. Осы себепті, Бас прокуратураға қалыптасқан жағдайға құқықтық баға беруді тапсырамын», - деді Тоқаев Үкіметтің кеңейтілген отырысында.
Тоқаев үкіметтегілерге бір айдың ішінде Қазақстан азаматтарының ЕАЭО елдерінен 2020 жылдың 1 ақпанына дейін әкелген көліктерін тіркетуге бұйрық берді.
«Бұл көліктердің тіркелуі 2021 жылдың 1 наурызына дейін күшінде болады. Мұндай көліктер техникалық регламенттің талаптарына сай болуы керек. Сондай-ақ, тіркеу сомасы мен мемлекеттік бажды төлеуі тиіс. Уақытша тіркеу бір қолдан екінші қолға сатылып барып, жасалмауы тиіс. 2021 жылдың 1 наурызына дейін автокөлік иелері көліктерін тұрақты тәртіпте тіркеп, кедендік баж бен утилизациялық соманы төлеуі тиіс. Болмаса ол көлікті елден шығаруы немесе заңнамамен тыйым салынбайтын басқа да амалмен мәселесін реттеуі қажет. Үкіметке Қазақстанның заңнамасына қайшы келетін көліктерді бұдан ары кіргізбеуді және пайдалануға шектеу қою шараларын қолға алуды тапсырамын», - деді президент.
Сонымен қатар Тоқаев бұл жерде отандық мүдде басты назарға алынуы керектігін тапсырды.