АРАЛДА 1950 м3 ҚАР СУЫ ТАЗАРТЫЛДЫ

tolqyn.kz Арал ауданы аумағында ағымдағы жылғы ақпан айының бірінші он күндігінде ауа райы күрт жылынды. Қыс мезгілінде толассыз жауған қардың шамадан көп болуына байланысты Арал қаласының кейбір ішкі көшелері бойында еріген қар суының жиналу жағдайлары қалыптасты. Бұл туралы Арал ауданы әкімінің баспасөз қызметі facebook парақшасында жазды.

Табиғаттың тылсым құбылысының салдарынан орын алып отырған проблемалық мәселелер аудан әкімдігінің қатаң бақылауына алынып, көше бойында жиналған қар үйінділері мен суларды тарту, тазалау жұмыстары тәулік бойы үздіксіз жүргізілуде.

Бүгінгі күнге дейін 1221 м3 қар үйінділері және 1950 м3 жиналған қар сулары қала сыртына шығарылса, қажеттіліктерге байланысты арнайы техникалармен (погрузчик, камаз) топырақпен қомдау, тұрғындардың қауіпсіздігін қамтамасыз ету шаралары қолға алынды.
Аталмыш жұмыстарға он беске (15) жуық арнайы техникалар тартылып, алпыстан (60) аса жауапты қызметкер (жұмысшылар) жұмылдырылуда.
Құрметті аудан тұрғындары мен қала қонақтары! Сіздерді табиғаттың тосын құбылысына түсіністікпен қарауға шақырамыз.