«Толқын» тыңдап тұр...
Ақпан айының соңғы аптасында редакцияға қоңырау соққан Серікқали Серіков есімді азамат:– Өзім Қарағандыда тұрамын. Әкемнің туған жері – Арал болғандықтан, ағайынның қуанышы мен қызығына келіп тұрамын. Бұл сапарымда да немере ағамыздың тойына келген едім. Алыстан келген соң, ағайын-туғанды аралап, сәлем бересің. Сондай кезде қарынды аштыратындай көрініске куә болдым. Арал қаласының қай көшесіндегі үйге барсақ та, аула сыртында үйілген қар. Тіпті қар үстіне түрлі қоқыстар да төгілген. Бұл көлікке де, жүргіншілерге де, әсіресе тар көшелерде ыңғайсыздық тудыруда. Оны көше бойынан шығарып тастап жатқан үй иесі жоқ. Тұрғындардың жауапсыздығы салдарынан күн жылынғаннан ойыстау жердегі көшелер мен іргетасы төмен орналасқан тұрғын үйлердің ауласын су басып, қоқыс қалдықтарын басқан жұрттың әбігерге түсетіні анық. Өзім де шағын қалада тұрамын. Бірақ дәл мынадай немқұрайлылық бізде жоқ.Қар тазалау ісіне ешкім енжар қарамауы тиіс. Сол себепті жауапты мекемелер, төтенше жағдай және учаскелік полиция қызметкерлері арнайы рейдке шығуы керек. Заң бойынша ауласының алдындағы қарды тұрғындардың өздері тазартуы тиіс. Тәртіпке бағынбағандарға шара қолданса ғана көше тазарады және жұртқа залалы тимейді. Көктемде белуардан су кешпес үшін қазірден бастап іске көшу керек. Мен еріген қар суынан қиындық көріп отырған қала тұрғындарына септігі болса екен деген оймен көргенімді айтып тұрмын, – деді.
«Сырт көз – сыншы» дегендей, Қарағандының азаматы осындай пікір білдірді. Бұл мәселенің жауабы қандай болмақ?..
