ЖАҢА ОҚУ ЖЫЛЫНА ДАЙЫНДЫҚ БАРЫСЫ БАҚЫЛАУДА

Кеше аудан әкімі М.Оразбаев жаңа оқу жылына дайындық барысымен танысу үшін бірқатар мектептер мен балабақшаларды аралап өтті. Белгілі болғандай 1 қыркүйектен бастап барша білім беру мекемелері жұмысын онлайн жүйеде жүргізе бастайды. Бүгінде аудандағы білім беру мекемелерінің бәрі қызмет көрсетуге дайын. Алайда, карантин режиміне байланысты 2020-2021 жаңа оқу жылында оқушылар "Мектеп онлайн" платформасы арқылы қашықтан оқытылады. Сонымен қатар жаңа талаптарға сәйкес 1-4 сынып оқушылары үшін кезекші сыныптар, балабақша ұйымдарында саны 15 баладан аспайтын кезекші топтар ашу жоспарланып отыр.
Аралау барысында аудан басшысы ат басын бұрған білім беру мекемелеріндегі қызметкерлермен кездесіп, алдағы кезеңге бей-жай қарамай, аса жауапкершілікпен жұмысқа кірісу қажеттігіне тоқталды. Сондай-ақ бірінші кезекте бала денсаулығының қауіпсіздігі үшін талап етілетін сақтық шараларын қатаң сақтауды тапсырды.
Атап өту қажет, аудан бойынша 2020-2021 оқу жылында 49 мектепте 17458 оқушы оқиды деп жоспарлануда. Оның ішінде 1 сыныпқа – 1737 оқушы қабылданбақ.
Жалпы 1-4 сынып бойынша 7092 оқушының 83,46 пайызы кезекші сыныптарға қамтылса, дистанционды форматта оқитындар саны 1173 оқушы.
Аудан әкімдігінің баспасөз қызметі.