Бүгін облыс әкімі Гүлшара Әбдіқалықова БАҚ өкілдерінің басшылары мен республикалық телеарна, баспа басылымдарының меншікті тілшілерімен кездесу өткізіп, журналистердің мәселелерін тыңдап, сауалдарына жауап берді. Бұл туралы облыс әкімдігінің баспасөз қызметі хабарлады.
Гүлшара Әбдіқалықова БАҚ өкілдеріне Қазақстан Республикасы Конституциясының 25 жылдығы қарсаңында жүздесіп отырғанын, журналистердің қоғам алдындағы орны ерекше екенін атап өтті.
Алдымен аймақ басшысы облыстағы короновирус індетіне қатысты ахуалды сөз етіп, вирус динамикасына қарай қолға алынған жұмыстарды баяндады. Сонымен бірге алдағы кезеңде жаңа жұмыс орындарын құру, өнеркәсіп өндірістерін көбейту, шағын және орта бизнес саласындағы мемлекеттік қолдау шараларын тарқатып берді. Мұнан өзге жылу беру маусымына дайындық мәселесі және жаңа оқу жылын қашықтан ұйымдастыру шараларына айрықша тоқталды.
Кездесуде облыс әкімі ауыл шаруашылығы бағытына арнайы тоқтап, күріш экспорты, егін шаруашылығын әртараптандыру мәселелерін қозғап, өңірдегі аграрлық саладағы басымдықтарды атады.
Басқосуға келген БАҚ өкілдері аймақ басшысына әлеумет, білім, экономика, ауыл шаруашылығы салаларындағы көкейде жүрген сауалдарын қойды. «Қызылорда қоғамдық Телерадиокомпаниясы» ЖШС құрылтайшысы Шәкизада Әбдікәрімов ақпаратты беру тәсілінде талдамалы ақпараттарды жетілдіру қажеттігін және жергілікті сала басқармаларының тиісті мәселелерге келгенде ашық ұстанымдарының жетпей жатқандығын атап өтті. Бұл ретте әрбір сала басшылары журналистермен тікелей қарым-қатынас ұстап, ақпараттық шектеулерге жол бермеу қажет деген ұсынысын ортаға салды. Ал, республикалық «Егемен Қазақстан» газетінің меншікті тілшісі Мұрат Жетпісбаев егіс алқаптарындағы су тапшылығы проблемасын алға тартып, суды үнемдеу мәселесіне ерекше назар аударуды сұрады. Облыс әкімі өзекті сауалға нақ жауап берді.

«Биылғы жылдан басталған суармалы судың тапшылығы егін шаруашылығына әсер етпей қоймады. Мұны біз білеміз. Осы жағдайды ескере келе, ауыспалы егіс жүйесіндегі күріш егісінің көлемін 75- 80 мың гектарға тұрақтандырып, мал азықтық дақылдар егісінің көлеміне басымдық беруді көздеп отырмыз»,-деді Гүлшара Әбдіқалықова.

Кездесуде республикалық «Әлімсақ» журналының бас редакторы Нұрлан Көбегенұлы ақпараттық ашықтық, тәуелсіз БАҚ өкілдеріне мемлекеттік тапсырыс беру мәселесін көтерді. Бас редактор өңірдегі сала басшылары ай сайын онлайн платформалар арқылы журналистермен кездесу ұйымдастырып, ортақ мәселелерді талқыға салатын кері байланыс тетіктерін іске асыруды сұрады. Ал, «Хабар» телеарнасының меншікті тілшісі Нұрлан Жақыпбек маман даярлау мәселесін қайта қарап, журналистермен тікелей қызмет жасайтын баспасөз хатшыларының жұмысын жандандыру қажеттігін сауал етіп қойды.