Қасым-Жомарт Тоқаев: Елдің амандығы бәрінен қымбат

Осы аптада Мемлекет басшысы Қасым-Жомарт Тоқаев коронавирус індетінің екінші кезеңіне дайындық мәселелері жөнінде кеңес өткізді. Президент алқалы жиында пандемияға және экономикалық дағдарысқа төтеп беру мақсатында мемлекет барлық қажетті шараларды қабылдап отырғанын, алайда аталған мәселеге қатысты алда тұрған міндеттер бүкіл ел болып жұмыла білгенде ғана өз деңгейінде жүзеге асатынын атап көрсетті. Мемлекет басшысы бірінші кезекте індеттің алғашқы кезеңінде жіберілген қателіктерді талдауға уақыт жеткілікті болғанын, эпи­демияға қарсы күрес кезінде біраз тәжірибе жинақталып, оларды мей­лінше тиімді пайдалану қажеттігін, сондай-ақ Үкімет осындай күрделі ахуалда өз жұмысын тиімді, сәтті жүргізіп келе жатқанын жеткізді.Басқосуда одан әрі елдегі жағдай тұрақталғанымен, босаңсуға болмайтыны тақырыпқа арқау болды. Қазақстан Президенті өз сөзінде көптеген елде эпидемиялық ахуал­дың нашарлағанын атап өтіп, осыған бай­ланысты жағдай ушыққан кезде оған мемлекеттік органдардың дайын болуы қажет екенін айтты. Қасым-Жомарт Тоқаев бірқатар түйткілді мәселені айта келе, тест сынамаларын алу көлемінің азайғанына назар аударды. Сондықтан тестілеу көлемін арттыруға қатысты шаралар қабылдау қажеттігін атап өтті. Осы орайда Мемлекет басшысы орта есеппен күніне 40 мыңнан 60 мыңға дейін зерттеу мүмкіндігі бола тұра 18 мың ғана зерттеу жүргізілетінін, зертханалардың жүктемесі 40% құрайтынын, осы жылдың 5 қазанындағы жағдай бойынша 100 мың тұрғынға тестілеудің ең төменгі деңгейі Қызылорда облысында, Шымкентте және Алматы облысында, максималды деңгей – Атырау, Батыс Қазақстан облыстарына тиесілі болғанын, зерттеулердің ең көп саны осы жылдың маусым айында өткізілгенін, яғни күніне 33 мың, 2020 жылдың 5 қазанында 11 мыңға жуық зерттеу жүргізілгенін сөз етті. Бұдан бөлек Президент тестілеу бағасына қатысты мәселеге назар аударды. Президент ел тұрғындарының жаз маусымында дәрі-дәрмек тапшылығын көргенін жиынға қатысушылардың есіне салды.

Мемлекет басшысы пандемияның екінші толқыны болған жағдайда негізгі салмақ тағы да медицина қызмет­­кер­леріне түсетініне ерекше тоқталды. Пре­зиденттің тапсырмасы бойынша екінші жартыжылдықта төлемақы үшін 150 млрд теңгеден астам қаржы бөлінген. Бірақ үстемеақы және сақтандыру төлемдерін алуда әлі күнге дейін бюрократиялық кедергілер бар. Мемлекет басшысы басқа да ауру түрлері бойынша тиісті медициналық көмек көрсетудің маңыздылығын атап өтті. Сондай-ақ, ана мен бала денсаулығын қорғау бойынша жағдайдың нашарлағанына арнайы тоқталды. Сонымен қатар кеңесте басқа да мәсе­лелер қарастырылды. Атап айтқанда, Мем­ле­кет басшысы Қасым-Жомарт Тоқаев Үкі­метке шетелдермен, әсіресе жағ­дай күрделеніп тұрған мемлекеттер­мен жол қатынасын барынша оңтайлан­дыруды тапсырды.

Президенттің айтуынша, әуежайларда, темір жол вокзалдарында қатаң эпидемиялық бақылау режімін қайта енгізіп, «қызыл аумақтан» келетін адамдарды экспресс-тестілеуден өткізу мәселесін жолға қою керек. Сондай-ақ Үкімет шетелдермен, әсіресе жағдай күр­деленіп тұрған мемлекеттермен жол қаты­насын барынша оңтайландыруы тиіс. Ол халықтың тыныс-тіршілігін қамтамасыз ететін қызметтердің үздіксіз жұмыс істеуінің маңыздылығын атап өтті.

Қасым-Жомарт Тоқаев Қазақстанды елдегі экономикалық белсенділіктің күрт төмендеуінен шыға алды деп есептейді. Бизнесті ынталандыру жөнінде шаралар қабылданып, тұрғындардың аз қамтылған топтарына көмек көрсетілді. Дүниежүзілік банк еліміздің әлеуметтік-экономикалық дамуының негізгі көр­сет­кіштерінің қарқынын жоғары баға­лады.

Жиында Президент бүгінде астық жинау ісі аяқталып келе жатқанын, биыл 20 млн тоннаға жуық астық жиналғанын, бұл өткен жылмен салыстырғанда 34%-ға артық екенін, жиналған өнімді сақтауды қамтамасыз ету және фермерлерге өнімін шетелге сатуда көмектесу қажеттігін жеткізді.

Мемлекет басшысы ауыл шаруашылығы саласына қатысты басқа да мәселелерді қозғады. Атап айтқанда, Президент ветеринарлық қызметтің даму деңгейінің төмендігі құс тұмауының өршуіне жол бермеу үшін уақтылы шаралар қабылдауға мүмкіндік бермегенін атап өтті.

Мемлекет басшысы сөзінің соңында негізгі күш халықта екенін, сондықтан ін­детке қарсы күресте ел болып бірлесе қи­мыл­дау өзінің жемісін беретінін атап өтті.

«Толқын» ақпарат.