Аналар кеңесі мүшелері кездесу өткізді

Бүгін Арал аудандық аналар кеңесінің ұйымдастыруымен орталық кітапханада 8 наурыз – Халықаралық әйелдер күніне орай «Алаштың асыл қыздары» атты кездесу кеші өтті. Кездесуге аналар кеңесінің мүшелері, ардагер аналар, саладағы абыройлы қызмет етіп табысқа жетіп жүрген нәзік жандылар қатысты.

Жуырда ғана өз жұмысына кіріскен аналар кеңесі аудандағы әйелдер ісінің өз деңгейінде атқарылуына үлес қосу мақсатында басшылық қызметтегі әйелдер қауымы мен жас мамандардың басын біріктіріп, тағылымды шара өткізді.

Кездесу барысында әр саланың ардагерлері, мемлекеттік қызметте болып, зейнеткерлікке шыққан аналар өздерінің тәжірибесімен бөлісіп, отбасылық өмір мен қоғамдық жұмыстарды қатар алып жүрудің сырына тоқталды. Кездесу кешінде сөз алған «Ұрпақтан ұрпаққа» қоғамдық бірлестігінің төрайымы, ардагер ана Ханзада Әбілғазиева өсиетті әңгімесімен бөлісті.

– Әйелдің құдіреттілігі оның барлық саланы игере білуінде. Әйелсіз ештеңенің мәні де, сәні де келіспейді. Өзім талай жыл басшылық қызметте болдым. Мен де сіздер сияқты бір кезде жас, жігерлі келіншек болған едім. Қазір әжелікке жетсем деп, қоғамдық жұмыстардан қол үзбей келемін. Біздің мықтылығымыз осында. Сіздерге де қажымас қайрат тілеймін,– деді.

Кездесу кешінде белсенді арулар аудандағы әйелдер ісін көтеру мақсатында атқарылатын жұмыстарға тоқталып, ойларын ортаға салды. Мұнан соң шараға қатысушылар кітапхана ішіндегі рухани құндылықтармен танысып, естелік суретке түсті.