Толқын Tolqyn.kz ақпараттық агенттігі
» » Ұлық мереке ұлықталды

Ұлық мереке ұлықталды

Айлардың сұлтаны, күллi мұсылман қауымы үшiн қасиеттi Рамазан айы да аяқталып, қимай қоштасатын күн де келді. Адамзат бойындағы барша асыл қасиеттерді ұлықтайтын, мейірім мен қайырымдылық, татулық пен бірлік, сабыр мен құлшылықты кеңінен сезінетін ай осы Рамазан айы болса, Ораза айт мейрамы осы бір айдың аяқталғанын айғақтайтын күн. Ислам дініндегі екі ұлық мейрамның бірі де осы Ораза айт мерекесі.Рамазан айының аяқталуымен келетін 3 күндік Ораза айты жайында «Ей, періштелерім, адамзат бейнет атқарса, ақысын талап етеді. Пенделерім Мен парыз еткен оразаны атқарып, ақысын алуға мешітке бет алды. Олар Мен үшін ораза ұстады, Менің пәрменіммен ауыз ашты, енді қуанышқа кенелсін. Сендер куә болыңдар, оларды жарылқадым» деген хадис те бар.
Намаз исламның басты ұраны болғандықтан Ораза айт мерекесі Айт намазымен бастау алатыны ақиқат. Бүгін аудандық Орталық мешітте де Айт намазы оқылып, ұлық мереке ұлықталды.
Таң атысымен мешітке бет түзегендердің қарасы өте көп болды. Осынау қадірлі күнде бір – біріне құрмет көрсетуге асыққан қалың жамағаттың көңілдеріндегі қуаныш көзерінен көрініп-ақ тұрды. Алла Елшісі Пайғамбарымыз (с.ғ.с) «Бір-біріңе сыйлық беріп, татуласыңдар... Бір-біріңе берген сыйлықтарың - араларыңдағы өшпенділікті жояды» деп сүннет етіп кеткендей адамзат бойындағы ізгі қасиеттердің бірі татулықтың туы көкке көтерілгендей әсер қалдырды. Құшақтаса амандасып, Аллаға салауат айтқан оларға мешіт ауласынан дәм ұсынылып, құрма мен судан дәм татты. Жиналғандарға Ораза айт мейрамы жайынанда кеңінен түсіндіріліп, ізгілікке бастайтын игі амалдар айтылды.
О. Жексембайұлы.
15 маусым 2018 ж. 2 003 0