"Birge-Тaza Qazaqstan" акциясы жалғасын табуда

Сазды ауылдық округі әкімінің аппараты мен Барсакелмес Мемлекеттік Табиғи Қорығы мекемесінің ұйымдастыруымен "Арал ауданында санитарлық, тазарту, көркейту және көгалдандыру шараларын өткізудің 2022 жылға арналған іс-шаралар жоспарына" сәйкес, "Birge-Тaza Qazaqstan" және "Мекенім жасыл-орманым" экологиялық акциясы аясында ағаш отырғызу шарасы өтті. Шараға елді мекеннің барлық мекемелері, ауыл тұрғындары белсене атсалысты.

Сонымен қатар қорық қызметкерлері республикалық "Парктер шеруі" табиғат қорғау акциясы тақырыбында мекемелер ұжымына және Ж.Түменбаев атындағы №60 орта мектеп оқушыларына танымдық сабақтар өткізіп, түсіндірме жұмыстарын жүргізді.

Ауыл әкімдігінде дөңгелек үстел өтіп, жиын барысында елді мекендегі құм басу қаупі мәселесі талқыланды. Ауыл әкімі С.Сүлейменов, тиісті қорлар есебінен құм көшкінін тоқтатуға қаражат тарту мақсатында ықпалдастық жасауға ұсынысын білдірді.

Аталмыш шаралар алдағы уақытта жалғасын табатын болады. Тұрғындарды ауылымыздың жасыл желекке айналуы үшін үлес қосуға шақырамыз. Мекеніміз өз ауламыздан басталатынын ұмытпайық және өскелең ұрпақты тазалыққа баулиық!