Энергетика министрі Болат Ақшолақов сұйытылған газ бағасына қойылған шектеу аяқталғаннан кейін баға қалай реттелетінін айтып берді, деп хабарлайды Stan.kz ақпарат агенттігі. 

«Өте төмен бағалар сақтала берсе, өндірісті көбейтуге ешқандай ынталандыру болмайды. Өйткені қазіргі бағалар газды шығаруға кететін шығыннан да төмен болып отыр«, – деді Ақшолақов мәжілістегі үкімет сағатында.

«Энергетика министрлігі мемлекеттік кірістер комитетімен бірлесе отырып, ішкі нарықта сатылатын сұйытылған газдың айналымын қадағалайды. Сондай-ақ, министрлік газ және газбен қамтамасыз ету туралы заңға өзгерістерді әзірлеп қойды. Бұл түзету бойынша Энергетика министрлігіне сұйытылған газдың бөлшек саудадағы шекті бағасын белгілеу құзыретін беру мәселесі қарастырылмақ. Тиісті түзетулер әзірленіп болған соң ҚР Парламент Мәжілісіне жолданады«, –  деді Болат Ақшолақов.

 «Газ қоры бойынша Қазақстан әлемде 22 орында, ал ТМД елдері арасында Ресей мен Түрікменстаннан кейін үшінші орында. Табиғи газды кеңінен пайдалану мүмкіндігін ескере отырып, әлемдік экономикада оның маңызы зор. Ел ішінде газ тұтыну тұрақты түрде өсіп келеді. 2017 жылдан бастап 2021 жылды қоса алғандағы кезеңде тұтыну 13,8-ден 18,6 млрд текше метрге дейін, яғни 4,8 млрд текше метр деңгейінде өсті. Газ тұтыну өсімі шамамен 35 пайызды немесе жыл сайын орта есеппен 7 пайызды құрады», – деді Болат Ақшолақов.

«Осыған байланысты 2025 жылға қарай отандық газдың тапшылығы және импорттық ресурстарға тәуелділік болуы мүмкін«, – деді министр.