Қасым-Жомарт Тоқаев: Экологиялық апаттың алдын алу үшін Аралға қаржы бөлу керек
Мемлекет басшысы келген қонақтарға алғыс айтты. Бұл туралы Ақорданың баспасөз қызметі хабарлады. «Аса қадірлі қонақтарымыз – Қатар Әміріне, Қырғызстан президентіне, Босния және Герцеговина Президиумының төрағасына, Өзбекстан премьер-министріне және форумның басқа да құрметті қатысушыларына шынайы ризашылығымды білдіремін.
Сіздердің осы жиынға арнайы келуге шешім қабылдап, форум жұмысына қатысқандарыңыз – біз үшін үлкен мәртебе. Жиын барысында жаһандық экономикалық және аймақтық ынтымақтастық мәселелерінің қазіргі жай-күйі жөнінде табысты пікір алмасамыз деп сенеміз», – деді Президент.
Мемлекет басшысы әлемдегі саяси-экономикалық, экологиялық ахуалды бірлесіп түзеу керек екеніне тоқталды. Оның ішінде Арал тағдыры да талқыға түсті.
«Аймақтағы екі үлкен өзен Сырдария мен Әмудариядағы су деңгейі 2050 жылға қарай 15 пайызға түседі. Біз аймақтағы экологиялық апаттың алдын алу үшін Халықаралық Аралды қорғау қорын қолдауға көбірек қаржы бөлуге шақырамыз.
Су мен климаттың өзгеру мәселесі өзара тығыз байланысты. Орталық Азия – су қауіпсіздігін сақтау тығыз әріптестік және бірлескен тиімді шараларды жүзеге асыру арқылы ғана шешілетін аймақ.
Аймақтағы климат және өзге де мәселелерді талқылау үшін мен Алматыда Орталық Азия елдерінің жобалық кеңсесін құруды және БҰҰ секілді халықаралық ұйымдарды тарта отырып, 2026 жылы Қазақстанда Аймақтық климаттық саммит өткізуді ұсынамын.
Еліміз «жасыл» экономиканың мол мүмкіндіктерін ұсынып, қайта қалпына келтірілетін энергетиканың орталығы атана алар еді. Алайда уақыт біздің жағымызда емес. Көмірді аз тұтыну және «жасыл» экономикаға қажетті жылдамдықпен көшу үшін бізге ресурстар мен серіктестік байланыс қажет», – деді Қасым-Жомарт Тоқаев.
aikyn.kz
