Толқын Tolqyn.kz ақпараттық агенттігі
» » Бүгін – Жалпыұлттық аза тұту күні

Бүгін – Жалпыұлттық аза тұту күні

Мемлекет басшысы Қасым-Жомарт Тоқаев 29 қазанды Жалпыұлттық аза тұту күні деп жариялады. Бұл туралы Egemen.kz хабарлайды.

«Қарағанды облысындағы И.А. Костенко атындағы шахтада болған апат салдарынан адамдардың қаза болуына байланысты Қазақстан Республикасында 2023 жылғы 29 қазанда жалпыұлттық аза тұту жариялансын», делінген Президент Қасым-Жомарт Тоқаевтың Өкімінде.

29 қазан күнгі сағат 09:00-де келіп түскен ақпаратқа сәйкес, Костенко шахтасында көз жұмғандар саны 35-ке жетті.

Еске сала кетсек, «АрселорМиттал Теміртау» АҚ-ға қарасты Костенко шахтасынан өрт шықты.

Президент Үкіметке «АрселорМитталТеміртау» компаниясымен инвестициялық ынтымақтастықты тоқтатуды тапсырды.

Бас Прокуратура аталған іске қатысты сотқа дейінгі тергеп-тексеруді бастады. Мемлекет басшысының тапсырмасына сәйкес Премьер-министр Әлихан Смайыловтың төрағалығымен Қарағанды облысында «АрселорМиттал Теміртау» АҚ-ның Костенко атындағы шахтасында болған апаттың себептерін тергеу және оның салдарын жою жөніндегі Үкіметтік комиссия құрылды.

Сондай-ақ Мемлекет басшысы Қасым-Жомарт Тоқаев апаттың мән-жайын анықтап, тиісті шешім қабылдау үшін Қарағанды облысына барды.

29 қазан елімізде Жалпыұлттық аза тұту күні деп жарияланды.
29 қазан 2023 ж. 262 0