Төл теңге отызға толды
Әр мемлекеттің тәуелсіздігін айқындайтын өзіне тән белгілері болатынындай, біздің еліміздің де ең басты белгісінің бірі – ол Ұлттық валютамыз теңге. Ұлттық валютамыз Қазақстан Республикасы көлемінде пайдаланылатын заңды төлем құралы. Ақша – асыл қазына, халық байлығы. 1991 жылы еліміз Тәуелсіздік алғаннан кейін Тұңғыш Президент Жарлығымен тәуелсіз елдің өзіндік айрықша валютасы болу керектігі аталып, алғашқы валюта Англияда «Харрисон және оның ұлдары» компаниясында жасалды. 1993 жылдың 12 қарашасында елімізге Ұлттық Теңгеміз енгізіліп, Н.Назарбаевтың бұйрығы бойынша 1993 жылдың 15-ші қарашасынан бастап Қазақстан Республикасы аумағында теңге валютасы айналымға шықты. Міне содан бері арада 30 жыл уақыт өтті. Алғашқы тиындар Германия елінде жасалды. Алғашқы айналымға шыққан Ұлттық валютамыздың бірінші бетінде қазақ халқының әйгілі, ұлы тұлғаларының бейнелері басылды. Шеттері қазақтың ою-өрнектерімен безендірілсе, екінші бетінде табиғат көріністері бейнеленіп, Елтаңбамыз салынған.Одан кейінгі айналымға шыққан теңгенің орта бөлігінде «Астана-Бәйтерек» монументі, Қазақстан Республикасының мемлекеттік Елтаңбасы және мемлекеттіқ туы, төменгі жағында ашық алақан бейбітшіліктің белгісі ретінде бейнеленген. Сонымен қатар қанатты барыс теңгеміздің негізгі бейнесі ретінде төл теңгенің алдыңғы жағында көрініс алған.1993 жылы теңгенің айналымға енгізілуі барысында Ұлттық банктің «Арал есеп-айрысу касса орталығы» қызметкерлерінің 2 аптадай уақытқа созылған ақша алмасу процесі кезінде күндіз-түні қажымай жасаған еңбектері ерекше болды. Сол кездегі басшымыз Темірхан Мақсұтқалиев ағамыздың басшылығымен осындай қиын да жауапты істі абыроймен атқарып шықтық. Халықтың сандық түбіне жинаған азғантай қаражаттары санаған кезде қолды қиятындай жаңа күйде айналымнан шығып кете барды. Оның орнына біздің билеріміз бейнеленген су жаңа төл теңгеміз келді, яғни биылғы жылы - Ұлттық валютамыз Теңгенің айналымға шыққанына 30 жыл! Халықтың банкке және ұлттық валюта теңгеге деген сенімі мол болуы үшін ұлттық теңгеміздің тұрақтылығы сақталып, құны арта түсу керек.
Егеменді еліміздің және ауданымыздың экономикасының нығайуы мен дамуына бағытталған, бюджет қаражатын тиімді және мақсатты жұмсалуына еңбек сіңіріп жатқан Қаржы саласы қызметкерлерін Ұлттық валюта Теңге күні мерекесімен құттықтаймыз!
Раш СЕРАЛИЕВА,
Арал аудандық қазынашылық басқармасының басшысы
