Қасым-Жомарт Тоқаев: Бүгін тарихи келісімге қол қоямыз

Бұл туралы Мемлекет басшысы Қасым-Жомарт Тоқаев Ақордада Қырғызстан Президенті Садыр Жапаровпен кездесуінде айтты, деп хабарлайды BAQ.KZ тілшісі.

Тоқаев Садыр Жапаровқа шақыруын қабыл алып, Қазақстанға ресми сапармен келгеніне алғыс айтты.

Мен бұл сапарға ерекше мән беріп отырмын. Қырғызстан – біз үшін бауырлас ел әрі маңызды серіктес, - деді Президент.

Тоқаев атап өткендей, халықтарымыздың мызғымас достығы ортақ тарихқа және рухани құндылықтарға негізделген. Осындай бастауы бар қазақ-қырғыз қарым-қатынасы стратегиялық серістестік рухында дамып келе жатыр.

Біз одақтастық байланысты нығайтуды қолға алдық. Бүгін біз тарихи келісімге қол қоямыз. Осы маңызды құжат қазақ-қырғыз қатынастарының дамуына тым серпін беретініне ешқандай күмән жоқ. Сол себепті үлкен үмітпен қарап отырмыз. Оған біздің мүмкіндігіміз де, ынта-жігеріміз де жеткілікті. Жоғарғы мемлекетаралық кеңестің отырысы ынтымақтастық аясын кеңейтуге жол ашады деп санаймыз, - деп айтты Мемлекет басшысы.

Бұған дейін Мемлекет басшысы Ақордада Қырғызстан президентін қарсы алған болатын.

18 сәуірде Мемлекет басшысы Қасым-Жомарт Тоқаев Қазақстанға ресми сапармен келген Қырғызстан Президенті Садыр Жапаровты елорда әуежайында қарсы алды.

Сондай-ақ Қасым-Жомарт Тоқаев пен Садыр Жапаров екі ел өнерпаздарының гала-концертін тамашалағанын еске сала кетейік.

Фото: baq.kz