Бекбауылда бақша өнімдері жиналуда

Жаздай қылған бейнеттің берекесін көрер алтын күздің де ауылы алыс емес. Соқаның ұшымен, кетпеннің күшімен жер жыртып, дән сепкен диқаншы қауымның алды әлдеқашан өнімдерін базар сөрелеріне шығарып үлгерді. Сол жұмыстар әлі де жалғасып жатыр.

Қазіргі таңда Бекбауыл ауылында бақша өнімдерін жинау жұмыстары қарқынды жүргізілуде. Ауылдық округте барлығы 14 гектар жерге бақша өнімдері егілді.

Егіншілікті кәсіп қылған тұрғындардың бірі – Бекбауыл ауылының тұрғыны Марат Ақтілеуов. Аудан әкімдігінің 2022 жылы бақша дақылдарын егуге берген су айдау насосының тиімділігін пайдаланып, бір топ ауыл тұрғындарымен бірге 5 гектар жерге бақша дақылдарын орналастырған шаруаның бүгінде бақша өнімдері сатылымға шыға бастады.

Қазіргі таңда егіншілер жинаған өнімдерін округтегі елді мекендерге және көршілес Әйтеке би кенті мен тағы да басқа елді мекен тұрғындарына өткізуде.