Егін еккеннің еңбегі ақталады

Ел экономикасының дамуына агроөнеркәсіп саласының, соның ішінде егін шаруашылығының маңызы зор. Бүгінде ауданда егін шаруашылығы қарқынды дамып, қалың көпшілікті қуантып келеді. Өткен жылы өңірімізде 166,7 гектар жерге егін егілсе, алдағы үш жылдықта бұл көрсеткішті бекітілген Жол картасына сәйкес 3000 гектарға дейін жеткізу жоспарланған. Сонымен бірге аудан көлемінде бүгінге дейін барлығы 535,2 гектар жерді егіске дайындау жұмыстары жүргізілген.         Биыл ауданда егін шарушылығымен айналысып, жұртшылық ризашылығына бөленген шаруа қожалықтары жетерлік. Соның бірлігі ретінде Атанши ауылдық округіндегі жеке кәсіпкер Елтай Төрехановты айтар едік. Еліміздің Батыс өңіріне қоныс аударған ол  егін шаруашылығымен айналысып, өз кәсібін дамытқан. Кейін туған жерге қайта оралып,  осы кәсіпті қолға алып, әрі қарай жалғастырды.
– Балғын балалық шағымның куәсі болған Арал өңірі мен үшін ыстық көрінеді. Ақтөбеде жүрсем де осы кәсіпті өз туған жеріме келіп дамыту ойымда болатын. Жалпы, егін шаруашылығы саласында 4 жылдық тәжірибем бар. Бүгінде 14 гектар жерге елді мекенде орналасқан су ұңғымасын пайдаланып, тіршілік көзін үнемдеу мақсатында тамшылатып суару әдісімен бақша, көкөніс дақылдарын егуді қолға алдым. Нәтиже жаман болған жоқ. Биыл қарбыз, қауын, қияр және картоп өнімдерін егумен айналыстым. Қарбызды 5 гектар, қауынды 4 гектар, қиярды 2 гектар жерге пайдалана отырып өндірдім. Ешқандай да дәрі қолданбай, таза өнім алу үшін еңбектендім. Бұл шаруашылығыма ағайындарым да  көмектесті. Әрине, Арал – несібелі жер. Мұнда балық, тұз өнімдері шығады. Ендігі кезекте Арал халқына бақша өнімдері қажет деген мақсатпен осында келіп, егін шаруашылығын қолға алдым. Алдағы уақытта көкөніс пен жемістің басқа да түрлерін егу жоспарда бар,–дейді кәсіпкер Елтай Төреханов.
         «Берсең – аларсың, ексең – орарсың» дейді дана қазақ. Жеке кәсіпкер қазіргі уақытта еккен өнімдерін аудан орталығына жөнелтіп, еңбегінің несібесін көріп отыр. Келешекте де ауданымыздың егін шаруашылығын дамыту мақсатында ауқымды жұмыстар атқаруды қолға алған Елтайға тек сәттілік тілейміз.
А.НҰРЛАНОВА