Алматыда халықаралық конференция өтті

Алатаудың баурайындағы алып мегаполис Алматы қаласында халық жазушысы, әлем әдебиетінің абызы атанған Ә.Нұрпейісовтың 100 жылдығына арналған халықаралық ғылыми-танымдық конференция өтті. Шараға көршілес мемлекеттерден жазушы-ғалымдар келіп, баяндама оқыды. Сыр елі қаншама дарын иелерін дүниеге әкелгенмен солардың ішінде қарымды қалам иесі – Әбдіжәміл Кәрімұлы Нұрпейісовтың орны бір төбе.

Телегей теңіз, ақ жал толқынның арпалысында жүріп, әлем әдебиетіне аяқ басқан алыптың күрделі өмір жолы мен талайлы тағдыры көпке үлгі болары анық.

Бүгінгі конференция барысында жазушылар, ғалымдар мен үзеңгілес-інілерінің баяндамалары мен естелік-сөздері арқылы Әбдіжәміл Нұрпейісовтың дарынды қабілеті мен қарымды қаламгерлік қыры кеңінен ашылды.

Ұлт қайраткерінің есімін ұлықтауға арналған конференцияға Сыр өңірінен зиялы қауым өкілдері, туған жері Арал ауданынан барған арнайы делегация, Әбдіжәміл Нұрпейісовтың туған-туыстары арнайы қатысты.

Шарада Қызылорда облысының әкімі Нұрлыбек Машбекұлы Нәлібаевтың құттықтау хатын облыс әкімінің орынбасары Ш.Байманов оқып беріп, аңыз тұлғаның 100 жылдық мерейтойына орай қолға алынатын шаралар легіне тоқталды.

XX ғасырдың қазақ әдебиетінің «алтын ғасыры» атануына зор үлес қосқан суреткерлердің бірі де бірегейі Әбеңнің әлем әдебиетінің алтын қорына қосылған «Қан мен тер» трилогиясы, «Соңғы парыз» дилогиясы күллі қазақ әдебиетінің табысы болып саналары хақ.

Мұнан соң аудан әкімі Аманжол Оңғарбаев бастаған бір топжазушының жерлестері Алматы қаласындағы "Кеңсай 2" зиратына барып, марқұм қаламгердің рухына Құран бағыштады.