Жаңа оқу жылында Қызылордада қанша бала 1-сыныпқа барады

Жаңа оқу жылында Қызылорда облысында 17 мыңнан астам бала тұңғыш рет мектеп табалдырығын аттайды.

Облыстық білім басқармасы ол үшін 2025 жылдың 1 сәуірі мен 31 тамызы аралығында құжат қабылданатынын мәлімдеді. Білім туралы заңға сәйкес балалар бірінші сыныпқа 6 жастан бастап ата-аналардың өтініші бойынша қабылданады.

— Құжаттарды eGov mobile қосымшасы мен электронды үкімет порталы арқылы, сондай-ақ қағаз түрінде — тікелей мектептерге тапсыруға болады. Ол үшін барлық мектепте қабылдау комиссиялары жұмыс істейді, — делінген басқарманың хабарламасында.

Биыл eGov порталында құжат тапсыру рәсімі жеңілдетілген. Енді ата-аналарға медициналық анықтамаларды қолмен жүктеудің қажеті жоқ. Бала денсаулығы паспорты мен профилактикалық екпе картасындағы мәліметтер автоматты түрде алынады. Егер медициналық анықтамалар жүйеде болмаса, олардың скан-көшірмелерін жүктеуге болады. Сондай-ақ өтініштің мәртебесін қарау және оны бір батырмамен кері қайтару мүмкіндігі қарастырылған.

Басқарма өкілдері өтініш мереке және демалыс күндерін қоспағанда дүйсенбіден жұмаға дейін қабылданатынын жеткізді. Сұраныс жіберілгеннен кейін өтініш 1 жұмыс күні ішінде қаралады.

Қызылорда облысында 2024-2025 оқу жылында да 17 мыңнан астам бала 1-сыныпқа қабылданды. Оның 93,1%-ға жуығы мемлекеттік тілде оқуға ниет білдірген болатын.

Ақпарат көзі: syrboyi.kz
Фото: Нұрболат Нұржаубай