Туристік саланы дамыту күн тәртібінде

Бүгінгі Үкімет отырысының күн тәртібіне сәйкес аймақ басшысының төрағалығымен «Туристік саланы дамыту және цифрландыру» мәселесі қаралып, бірқатар тапсырмалар берілді. Осыған орай аудан әкімдігінің мәжіліс залында арнайы мәжіліс өтіп, аудан әкімі Аманжол Оңғарбаев көтерілген мәселеге сай тиісті бөлім басшылары мен салаға жауапты аудан әкімінің орынбасарларына бірқатар міндеттер жүктеді.
– Өңірде туризм саласы бойынша индикаторлардың толық орындалуын қамтамасыз етіп, ауданға келетін туристердің санын арттыру бойынша жұмыстарды күшейту маңызды. Ауданда туристік әлеуеті жоғары «Қамбаш» жағажайы жазғы мезгілде облыстық, тіпті республикалық туристік саланы дамытуда алатын орны да ерекше. Алдағы уақытта жағажайда демалушыларға қолайлы жағдай жасау үшін кәсіпкерлік нысандардың заманауи үлгіде салынуына түсіндірме жұмыстарын жүргізуді тиісті салалық бөлім басшысы мен ауыл әкімі қолға алуы тиіс, – деді аудан әкімі А.Оңғарбаев.

Сонымен қатар суға түсу маусымы кезеңінде жағажайда құқық бұзушылықтар мен топтық төбелестерді болдырмау бағытында қажетті шараларды қабылдау және жағажайдағы демалушы адамдардың судағы қауіпсіздік шараларын қатаң сақтауына, оның ішінде балалардың қауіпсіздігіне аса мән беруі керектігін атап өтті.

Жиын барысында аудан әкімі Аманжол Сақыпұлы жылы маусымдарда қауіптілігі арта түсетін «Конго-Қырым» қызбасы ауруының алдын алу жұмыстарын назардан тыс қалдырмау жөнінде бірқатар жауапты тұлғаларға арнайы тапсырма жүктеді.