Көпбалалы отбасыларды үймен қамту мәселесін 3-4 жылда шешеміз - вице-министр
НҰР-СҰЛТАН. ҚазАқпарат - Осы жылдың соңына дейін 12 мың көпбалалы отбасын үймен қамту көзделуде. Бұл туралы Үкіметтің баспасөз орталығындағы брифингте ҚР ИИДМ бірінші вице-министрі Қайырбек Өскенбаев айтып берді, деп хабарлайды ҚазАқпарат тілшісі.«Елбасы көпбалалы және аз қамтылған отбасыларды тұрғын үймен қамту мәселесін тапсырған болатын. Сол себепті, керекті шаралардың бәрі толық қабылданды. Бүгінгі таңда Қазақстанда 340 мыңнан астам көпбалалы отбасы бар. Оның ішінде кезекте тұрғаны 31750. Тапсырма беріліп жатқан кезде 28 123 отбасы кезекте тұрған еді. Осы бір жарым айдың ішінде 3 мыңнан астам көпбалалы отбасы қосымша кезекке тіркелді. 2025 жылға дейін толықтай қаражат көзделгенін өздеріңіз білесіздер. 40 мыңнан астам пәтер саламыз деп отырмыз. Биыл 6 мың жалға берілмейтін және сатылмайтын пәтерлерді тапсырамыз. Ол жұмыс басталып кетті», - деді вице-министр Елбасының «Әлеуметтік қамқорлық» шаралары бойынша көпбалалы және аз қамтылған отбасыларды тұрғын үймен қамту механизмі жайлы. Қайырбек Өскенбаевтың айтуына қарағанда, 1 мамырдан бастап көпбалалы отбасыларға үйлер тапсырылып жатыр. «Осыған дейін 249 үй тапсырылса, кеше Өскемен мен Семей қалаларында тағы қосымша 10 пәтер табысталды. Осы айдың кезегі бойынша 1200-1300 пәтер тапсырылады деп жоспарлап отырмыз. Әр күн сайын кесте бақылануда. Ертең, яғни 9 мамырда БҚО-да, Шымкентте, 15 мамырда Атырау облысы мен Алматы қаласында көпбалалы отбасыларға үй табыстау жоспары белгіленген», - дейді ол. Вице-министр өз сөзінде пәтерді жекеменшікке сатып аламыз деген көпбалалы отбасылар болса, оларға бөлек Тұрғын үй-жинақ банкі арқылы тағы да 6 мың пәтер қарастырылғанын атап өтті. «Қабылданған шаралар бойынша көпбалалы отбасылар бөлек санаттарға жатқызылып, бірінші кезекте үймен қамтылуы көзделген. Сол жоспар бойынша «Нұрлы жер» бағдарламасына толық өзгерістер енгізілді. Осы басталған жұмысты ай сайын, күн сайын қадағалап отырамыз. Негізі берілген тапсырма толықтай орындалады. Бүгінгі күні кезекте тұрған көпбалалы отбасылар Үкімет тарапынан 2025 жылға дейін үймен қамтылады. Сол себептен, оған қобалжымасын. Тұрғын үй жинақ банкі арқылы 6 мың отбасы үй алсатын болса, биыл 12 мыңнан отбасыны үймен қамтитын болсақ - 3-4 жылдың ішінде осы мәселені (көпбалалы отбасыларды үймен қамту) шешеміз деп отырмыз», - дейді Қайырбек Өскенбаев.
www.inform.kz
